“Gəzən Kitabxana 3” adlı layihə Gənədə uğurla davam etdirilir. Gənclər və İdman Nazirliyinin dəstəyi ilə Azərbaycan Tələbə Gənclər Təşkilatları İttifaqı tərəfindən Gəncə şəhərində reallaşan layihə “2016-cı il Avropa Gənclər Paytaxtı” çərçivəsində keçirilir.

Mediatv.az-a ADAU-nun mətbuat xidmətinin xəbərinə görə Gəncənin digər yerləri ilə yanaşı, kitabxana 10 gün müddətində Azərbaycan Dövlət Aqrar Universitetinin tələbələrinə də xidmət göstərəcək.  27 oktyabrdan universitetdə reallaşan layihənin əsas məqsədi gənclərin kitaba, eləcə də elektron qiraətə marağını artırmaqdır.

Üstüörtülü, xüsusi yük maşınında səyyar fəaliyyət  göstərən “Gəzən kitabxana”da beş min kitab və on min elektron nəşr var. Artıq 7 gündür tələbələrə xidmət göstərən “Gəzən kitabxana”nın zəngin kitab fondu, həmçinin yeniləşən elektron kitab bazası var.