"Naxçıvan aeroportundan mənə zəng edib öz şikayətini bildirən bir vətəndaşa kobudcasına müdaxilə edən polis əməkdaşı şikayətçinin əlindən telefonunu zorla alıb söhbətimizi yarıda kəsdi". Mediatv.az bildirir ki, bu iddia ilə tanınmış jurnalist Heydər Oğuz çıxış edib.

Daha sonra Prezidentin Naxçıvandakı xüsusi nümayəndəsi Fuad Nəcəfliyə xitab edən jurnalist bildirib: "Vətəndaşa rəsmən Vasif Talıbovun atasına rəhmət oxutdururlar, cənab xüsusi səlahiyyətli canişin! Buna görəmi sizi Naxçıvana göndəriblər?"

Onu qeyd edək ki, 1 saat sonra da vəziyyət dəyişməyib. Mediatv.az jurnalistin bu barədə açıqlamasını təqdim edir:

"Aeroportda polis kobudluğu ilə qarşılaşan vətəndaş şikayət etmək üçün Naxçıvan şəhər polis idarəsinə yollanıb. Nə qədər əlləşibsə idarədə şikayət ərizəsini qəbul etməyiblər. Dediyinə görə, ərizənin qəbul edilməməsi göstərişini polislərə birbaşa idarənin rəisi verib.

Bu nə özbaşınalıqdır, anlamaq mümkün deyil. Görünən budur ki, Naxçıvan rəhbərliyi özünü Afrika cəngəlliyində hesab edir. Yəqin havaların isti keçməsindəndir".

Məsələ ilə bağlı qarşı tərəfi də dinləməyə hazırıq...