İyul ayının 1-dən etibarən Azərbaycanın bütün quru sərhədlərini açacağı gözlənilir. Bu məlumatı “Caucasian Live” teleqram kanalı yayıb. Nazirlər Kabinetinin mətbuat katibi İbrahim Məmmədov isə bu barədə qərarın hələ olmadığını bildirib. Qeyd edək ki, Nazirlər Kabinetinin son qərarı ilə sərhədlərdə keçid məhdudiyyəti 1 iyula qədər uzadılıb.
Nəzərə alaq ki, quru sərhədlərin açılmasını böyük intizarla gözləyənlərin sayı milyonlarladır. Pandemiya bitsə də, Nazirlər Kabinetinin xüsusi karantin rejiminin müddətini hər dəfə uzatması və heç bir əsaslı səbəb də göstərməməsi insanların əsəbinə toxunur. Əslində, xüsusi karantin rejimi yalnız quru sərhədlərə münasibətdə işlək qalıb. Bütün başqa sferalarda karantin qaydaları çoxdan sıfırlanıb. İnsanları düşündürən və qıcıqlandıran da məhz budur. Necə olur ki, ölkədən hava nəqliyyatı ilə gediş və ölkəyə gəlişdə karantin qaydaları gücdən düşüb, heç "Covid" pasportu da tələb olunmur, amma quru yolla gedib-gəlmək istəyənlərə maneə yaradılır? Məlum məsələdir, hava nəqliyyatı ilə səfərlər hər kəsin cibinə - büdcəsinə uyğun deyil. Aztəminatlı, orta təminatlı insanlar üçün quru yolla hərəkət etmək əlverişlidir. Quru sərhədlərin iyulun 1-dən açılacağı xəbəri isə gözü yolda qalanlar üçün nəfəsliyin açılması effektini yaradır. Xəbər reallığı nə dərəcədə əks etdirir?

Mediatv.az-ın məlumatına görə, iqtisadçı Natiq Cəfərli Sherg.az-a açıqlamasında qeyd etdi ki, quru sərhədlərin açılması əksəriyyətin gözlədiyi hadisədir:

- Zaman-zaman belə xəbərlər yayılır. Xüsusi karantin rejiminin bitməsinə az müddət qaldıqda bu tip xəbərlər tirajlanır, sonra isə Nazirlər Kabinetinin xüsusi karantin rejiminin daha 3 ay uzadılması barədə qərarı ilə ümidlər sönür. Quru sərhədlərin iyul ayının 1-dən etibarən açılacağı da bu səpkili növbəti xəbərdir. Məsələ burasındadır ki, Nazirlər Kabineti quru sərhədlərinin niyə qapalı saxlandığına dair heç bir əsaslı dəlil, sübut ortaya qoymur, bunu pandemiya ilə də əlaqləndirə bilmir. Çünki Ümumdünya Səhiyyə Təşkilatı özü pandemiya ilə protokolları artıq ləğv edib. NK əgər quru sərhədləri növbəti dəfə də qapalı saxlamaq barədə qərar verəcəksə, başqa bir səbəb göstərməlidir. Quru sərhədlərin pandemiyaya görə qapalı saxlanmasının dünyada örnəyi yoxdur artıq. Ümid var ki, Nazirlər Kabineti növbəti toplantısında quru sərhədlərin açılması barədə qərar versin. Bu, mərhələli şəkildə də icra edilə bilər. Əvvəlcə Gürcüstanla, Türkiyə ilə quru sərhədlər açılsın, sonra Rusiya, İranla. Quru sərhədlərin 4 ilə yaxın müddətdə qapalı saxlanması iqtisadiyyatımız üçün də ziyanlıdır, insanların psixologiyasına da mənfi təsir göstərir.