Virtualaz.org saytı xəbər verir ki, Rusiya DİN bu əməliyyatın təfərrüatlarını, saxlanıların bəzilərinin adlarını və görüntülərini yayıb.

Açıqlamada bildirilir ki, “sxodka” Moskva məşhur kriminal avtoritet “Ded Xasan”ın məkanı hesab olunan “Starıy fayton” restoranında keçirilirmiş.

Xəbərdə deyilir ki, “işgüzar nahara” toplaşan “vorlar” qəfildən xüsusi təyinatlı SOBR dəstəsi döyüşçülərinin basqınına məruz qalıb. Kriminal avtoritetləri yerə uzadıblar, ancaq onlara qarşı nəzakətli davranıblar. Saxlanılanlar polis kamerasına bir-bir özlərini təqdim ediblər. Məlum olub ki, onlarln arasında “İslam Bolşoy”, “Qoca Kutaisski”, “İlqar” ləqəbli azərbaycanlı kriminal avtoritetlər də var. “Sxodka”da milliyətcə rus və gürcü avtoritetlərin də toplaşdığı bildirilir.

Saxlanılanlar polis şöbəsində dindirildikdən sonra onlardan üçünə qarşı cinayət işi qaldırılıb. Bunlar 37 yaşlı Azərbaycan vətəndaşı, “İlqar” kimi tanınan kriminal avtoritet, 36 yaşlı “Qoca Kutaisski” və “Zyuza” adlı digər “vor”lardır. Onların üzərindən narkotik maddə tapıldığı bildirilir. Qalanlar isə buraxılıb.