Məşhur kriminal avtoritet, “Timur Sverdlovski” ləqəbli Timur Mirzoyev bu gün Moskvada ölüb

"Mediatv.az" saytı Rusiya KİV-lərinə istinadən xəbər verir ki, onun ölümünə səbəb vərəm xəstəliyi olub.

“Timur Sverdlovski” milliyyətcə yezidi kürd idi. O, 2012-ci ildə öldürülən məşhur kriminal avtoritet, “Ded Xasan” ləqəbli Aslan Usoyanın qohumu idi. Aslan Usoyan öldürüləndən sonra onun qruplaşmasına “Timur Sverdlovski” başçılıq edirdi. “Timur Sverdlovski”nin qruplaşmasında əsasən azərbaycanlı, kürd və gürcü kriminal avtoritetlər cəmləşib.

Xəbərə görə, Timur Mirzoyev təcridxanada ölüb. O, bir neçə gün əvvəl polis əməkdaşları tərəfindən “oğru sxodkası”ına qarşı keçirilən əməliyyatda saxlanılıbmış. Hüquq-mühafizə orqanlarından bildirilib ki, kriminal avtoritetin ölümünə açıq vərəm xəstəliyi səbəb olub. Xəbərdə bildirilir ki, onun xəstəliyi yanvarın 25-də şiddətlənib və kriminal avtoritet koma vəziyyətində xəstəxanaya aparılıb.