Bu gün Bakı Ağır Cinayətlər Məhkəməsində sosial şəbəkədəki söhbətə görə sinif yoldaşına 18 bıçaq vuran 1998-ci il təvəllüdlü Rövşən Şahmarovun cinayət işi üzrə məhkəmə prosesi keçirilib.

Qafqazinfo-nun verdiyi xəbərə görə, hakim Tamella Nəsrullayevanın sədrliyi ilə keçirilən prosesdə zərərçəkən Elvin Muradovun sinif yoldaşı Elçin Bayramov ifadə verib.

O, həmin gün Elvini qan içində tapdığını deyib: "Həmin günü Elvinlə sınaq imtahanına gedəcəkdik. Ona zəng etdim, dedi ki, Rövşənlə dalaşıb və bıçaqlanıb. Onun yanına getdim, gördüm Elvin qan içindədir. Elvin şit zarafat nəticəsində hadisənin baş verdiyini dedi. Onların zarafatı qız şəkli üstündə baş verib".

Rövşən Şahmarov da ifadəsində davaya qız şəklinə Elvinin şit zarafat edərək yazdığı şərhin səbəb olduğunu deyib: "Facebook-da sinif yoldaşım qızla şəklimi paylaşdım. Elvin şəklin altına rəy yazdı. Ona belə şit zarafatlar etməməsini dedim. Dava da bunun üstündə düşdü, sonra WhatsApp-da bu barədə söhbət etdik. Məsələni həll etməkçün görüşmək qərarına gəldik. Görüşəndən sonra mübahisə böyüdü, mən də onu bıçaqladım. Amma Elvin bıçaqlanandan sonra da üstümə cumurdu, mən də məcbur olub 18 bıçaq vurdum".

Məhkəmənin növbəti iclası sentyabrın 18-də keçiriləcək.

Qeyd edək ki, Nizami rayonunda yerləşən 238 saylı məktəbin şagirdi Rövşən Şahmarov sinif yoldaşı Elvin Muradova 18 bıçaq vurub. E.Muradov həkimlərin səyi nəticəsində sağ qalıb.