Sabiq səhiyyə naziri Əli İnsanovun şikayəti üzrə 1 saylı Bakı İnzibati-İqtisadi Məhkəməsində keçirilən proses yekunlaşıb. Şikayətə hakim Elçin Məmmədovun sədrliyi ilə baxılıb.

Əli İnsanov həbsdə olduğu müddətdə pis rəftara və işgəncəyə məruz qaldığı iddiası ilə ədliyyə naziri Fikrət Məmmədovu və Penitensiar Xidməti məhkəməyə verib. Azərbaycan məhkəmələri şikayəti təmin etməsə də, Avropa İnsan Hüquqları Məhkəməsi Əli İnsanovun işgəncəyə məruz qalması faktını tanıyıb və bununla bağlı qərar qəbul edib. Ali Məhkəmə Avropa Məhkəməsinin qərarına uyğun olaraq sabiq nazirin işgəncəyə məruz qalmasının araşdırılması üçün işi Bakı Apelyasiya Məhkəməsinə göndərib. Bakı Apelyasiya Məhkəməsi isə işə baxmaqdan imtina edərək onu 1 saylı Bakı İnzibati-İqtisadi Məhkəməsinə ötürüb. Əli İnsanov 1 saylı Bakı İnzibati-İqtisadi Məhkəməsində keçirilən prosesdə iştirakdan imtina edib.

Hakim Elçin Məmmədov “Media forum” saytına deyib ki, məhkəmə Əli İnsanovun şikayəti üzrə iki qərardad qəbul edib: “Birinci qərardad şikayətin bir hissədə təmin olunmasının qeyri-mümkün sayılması və rədd edilməsi haqdadır. Vəzifəli şəxslərə qarşı iddianın təmin olunmasını qeyri-mümkün saymışam və rədd etmişəm. İkinci qərardad isə iddiaçının və vəkillərinin prosesdə iştirak etməməsinə görə şikayətə baxılmasının qeyri-mümkün sayılması haqdadır”.

Hakim bildirib ki, dəfələrlə bildirişlər göndərmələrinə baxmayaraq Əli İnsanov və vəkilləri məhkəmə proseslərində iştirakdan imtina ediblər: “Məhkəmə proseslərini bir neçə dəfə təxirə saldıq. İddiaçıya və vəkillərinə prosesdə iştirak etmək üçün rəsmi bildirişlər göndərdik. Amma məhkəməyə gəlmədilər. Onlar iştirak etmədiklərinə görə şikayətə baxılmasını qeyri-mümkün saymışıq”

Əli İnsanov və vəkilləri 1 saylı Bakı İnzibati-İqtisadi Məhkəməsinin vəzifəli şəxslərə qarşı iddianın təmin edilməməsi qərardadı ilə razılaşmayıblar və Bakı Apelyasiya Məhkəməsinə şikayəti veriblər.

Xatırladaq ki, sabiq nazir 2005-ci ildən həbsdədir. O, korrupsiya ittihamı ilə 11 il müddətinə azadlıqdan məhrum edilib. 2013-cü il martın 14-də Avropa İnsan Hüquqları Məhkəməsi sabiq nazirin ədalətli mühakimə olunmadığı haqda qərar çıxarıb. Həmin qərara əsaslanan Azərbaycan Ali Məhkəməsinin Plenumu Əli İnsanovun işini yenidən baxılması üçün apelyasiya instansiyasına göndərib. 2014-cü ilin fevralında Bakı Apelyasiya Məhkəməsi Əli İnsanov barəsində çıxarılmış 11 illik həbs qərarını qüvvədə saxlayıb.