Xəbər verdiyimiz kimi, sabiq deputat Gülər Əhmədova ilə ABU-nun keçmiş  rektoru Elşad Abdullayev arasındakı  “Mandat alveri” qalmaqalının qurbanı, 2012-ci ilin dekabrında İstanbulda dünyasını dəyişən Sevinc Babayevanın oğlu Ayxan Məmmədov həbs edilib. Bu barədə redaksiyamıza özünü A.Məmmədovun dostu kimi təqdim edən Orxan adlı şəxs məlumat verdi. Dostu bildirdi ki,A.Məmmədov barədə 25 iyunda Binəqədi Rayon Məhkəməsində keçirilən proses zamanı hökm çıxarılıb.

Binəqədi Məhkəməsində hakim Tale Kərimovun sədrliyi ilə keçirilən prosesdə Ayxan Məmmədov Cinayət Məcəlləsinin 177.2.2 maddəsi (oğurluq) ilə həbs olunub.
A.Məmmədovun həbsinə 4-cü mikrorayonda yerləşən “Favorit” marketdə oğurluq etdiyi iddiası səbəb olub. Onun sözügedən marketdən ətir oğurladığı təsdiqlənib və A.Məmmədov 3 il 6 ay müddətinə azadlıqdan məhrum edilib.

Gunxeber.com-un əldə etdiyi məlumata görə, paytaxtda, xüsusən də Binəqədi rayonunda fəaliyyət göstərən “Favorit” marketlər şəbəkəsi deputat Hacı Madər Musayevə məxsusdur. M.Musayev parlamentdə Binəqədi rayonunu təmsil edir. Ona məxsus “Favorit” marketlər şəbəkəsi 2013-cü ilin avqustundan fəaliyyətə başlayıb. Amma bu marketlər şəbəkəsində işlərin yaxşı getmədiyi bildirilir