“Xəzər Lənkəran”ın idman direktoru Yunis Hüseynovun “Qafqazinfo”ya müsahibəsi 

- Mövsüm artıq sona yaxınlaşır. “Xəzər Lənkəran” yay fasiləsində nələr edəcək? 

- Düzdü, müəyyən fikirlərimiz var. Amma qarşıdakı oyunlar bitdikdən sona bu suala dəqiq cavab verə bilərik. 

- Komandaya yenidən əcnəbi futbolçuların transfer məsələsi gündəmdədir. Növbəti ildən yenidən iddialı olacağınız deyilir. Bu nə dərəcədə doğrudur? 

- Biz bu barədə danışmışıq. Gələn ildən iddialı komanda qurmaq istəyirik. Çempionluq uğurunda mübarizə aparmaq fikrindəyik. Mövsüm bitikdən sonra artıq bu yolda işlərimizi davam etdirəcəyik. 

- Bu ay sizin Afrikaya səfəriniz gözlənilir. Nə vaxt bu səfərə yollanacaqsınız? 

- Gələn ay səfərə gedəcəm. Planımda həqiqətən belə şey var. Sadəcə müəyyən proseslər var ki, onları gözləməliyik. Növbəti ayda bu səfər reallaşdırmağa çalışacağıq. 

- Afrikada hansı ölkələrdə olacaqsınız və orada izləyəcəyiniz futbolçular bəllidirmi? 

- Mali və Qanada olacağam. Əsas fikrimiz orda komandaların oyunlarına baxmaqdır. Sırf hansısa futbolçuya görə Afrikaya getmirəm. Ümumi matçlara baxıb lazım olanları seçəcəyik. Baxışa çağırmaq fikrimiz var. 

- Bildiyimizə görə oradan da Portuqaliyaya gedəcəksiniz. Bu ölkədə hansı komandaları izləmək fikrindəsiniz? 

- Hazırda Mali, Qana və ordan da Portuqaliyaya səfər nəzərdə tutulub. İndi biz baxacağımız matçların vaxtını müəyyələşdirmək üçün gözləyirik. Yəni hansı oyunları izləyə biləcəyimizi müəyyənləşdirdikdən sonra səfər olacaq. 

- Dünən “Xəzər Lənkəran”a transfer qadağası qoyulması ilə bağlı söz-söhbətlər var idi. Bunlar nə qədər həqiqətə uyğundur və bu məsələdən sizin xəbəriniz varmı? 

- Bu barədə suallara cavab vermək istəmirəm. 

- Əgər belə bir şey olsa, komandanın durumu necə olacaq?

- Biz işimizi görürük. “Xəzər Lənkəran” transfer edəcək. Ona uyğun da hazırlıqlarımızı davam etdiririk. Yeni futbolçularla güclənmək niyyətindəyik. 

- Hazırda komandanın düşərgəsinə baxışda ukraynalı futbolçu var. Andrey Saxneviçlə bağlı qərarı nə vaxt verəcəksiniz? Baş məşqçi onunla bağlı sizə hansı fikirləri bildirib? 

- Andrey Saxneviçlə bağlı qərarı Elbrus Məmmədov verəcək. Bilirsiz, bir futbolçunun necə olduğunu bilmək üçün onu meydanda izləmək lazımdır. Elbrus müəllim hazırda ukraynalı müdafiəçini məşqlərdə yoxlayır. Qərarını verdikdən sonra bizə də bildirəcək. 

- O zaman belə nəticəyə gəlmək olar ki, Elbrus Məmmədov növbəti mövsüm də komandada qalacaq? 

- Bəli. Onunla yolumuza davam etmək niyyətindəyik. 

- Georgi Çıxradzenin “Xəzər Lənkəran”a baş məşqçi gəlməsi haqqında xəbərlər var... 

- Yox. Bunlar həqiqətə uyğun deyil. Hazırda baş məşqçi məsələsi də gündəmdə deyil. Elbrus Məmmədov komandamızın başındadır. Ona inanırıq və növbəti mövsüm də “Xəzər Lənkəran”da uğur qazanacağına ümid edirik.