Daşınar əmlakın yüklülüyü reyestri Azərbaycanda kiçik və orta sahibkarlığın inkişafında katalizator rolunu oynayacaq.

Mediatv.az  xəbər verir ki, bu sözləri bu gün keçirilən Maliyyə Bazarlarına Nəzarət Palatası tərəfindən yaradılmış Daşınar əmlakın yüklülüyünün dövlət reyesterinin tədbirində çıxışı zamanı Palatanın baş icraçı direktoru İbrahim Alışov deyib.

O bildirib ki, ölkədə daşınmaz əmlaka olan maraq artan temp üzrə davam edir:

“Hazırda Azərbaycanda girov kimi, daha çox daşınmaz əmlaka üstünlük verilir. Təbii ki, bu, daşınmaz əmlakın risklərlə bağlı üstünlüyü ilə əlaqədardır. Xarici təcrübə isə fərqlidir.

Məsələn, inkişaf etmiş ölkələrdə kreditlər ÜDM-nin 60%-ni təşkil edir. Bizdə bu rəqəmlər çox aşağıdır. Bundan başqa, biznes yatırımlarının 60-70%-i daşınar əmlaka yatırılır”.

Baş icraçı direktor ölkədə kredit sisteminin inkişafı üçün daşınar əmlakların qeydiyyatının əhəmiyyətli olduğunu deyib:

“Bizdə daşınar əmlakın yüklülük prinsipləri yox idi və bu öz növbəsində kredit almaqda çətinliklər yaradırdı. Bu yenilik yeni iqtisadi münasibətlərin yaranmasında mühüm əhəmiyyət kəsb edəcək.

Əminik ki, bu reyestrin fəaliyyətə başlaması maliyyə resurslarına və dövlətimizin inkişafına səbəb olacaq”.