"Bu il bankların faiz gəlirlərində müşahidə olunan azalma, əsasən, hüquqi şəxslərə verilən kreditlərdə faizlərin aşağı düşməsilə bağlıdır".  

Mediatv.az  xəbər verir ki, bunu Azərbaycan Banklar Assosiasiyasının prezidenti Zakir Nuriyev Marja-ya açıqlamasında bildirib.

O qeyd edib ki, devalvasiyadan sonra bankların kredit portfelləri kəskin olaraq azalmağa doğru meyillənib: "Eyni zamanda, dövlətin qəbul etdiyi qərarlar nəticəsində nağdsız hesablaşmalar artdı. Artıq bank sektorunda 6 milyard manatdan artıq likvid vəsait yığılıb.
Həmçinin bankların cəlb etdikləri valyuta vəsaitlərinin (Dollar əmanətlərinin) faiz dərəcələri kəskin aşağı düşüb. Manat əmanətlərinin də faiz dərəcələrinin aşağı düşdüyünü müşahidə edirik. Bunun nəticəsində, bankların hüquqi  şəxlərə təqdim etdikləri kreditlərin də faizləri azalıb. Kredit faizlərinin azalması bankların faiz gəlirlərinin azalmasında özünü göstərir. Eyni zamanda, bankların faiz gəlirlərində baş verən azalma, faiz xərclərinin azalması ilə kompensasiya olunur. Çünki banklar vəsaitləri daha aşağı faizlərlə cəlb ediblər. Hesab edirəm ki, 2018-ci ildə bankların kredit aktivliyi yüksələcək və artan aktivlik faizlərin aşağı düşməsindən yaranan geriləmələri aradan qaldıracaqdır”.

Qeyd edək ki, əksər bankların kredit portfelləri və faiz gəlirləri azalıb. Bir çox banklarda qeyri-faiz gəlirlərinin də azaldığı müşahidə olunur.