Gürcüstan və “Qazprom” 2017-ci ildə Rusiyadan Ermənistana tranzit olaraq nəql olunan qaza görə ödənişin olunmasına dair razılıq əldə edə bilməyiblər.

Mediatv.az:  Avstriyanın paytaxtı Vyanada Gürcüstanın baş nazirinin müavini, energetika naziri Kaxa Kaladze ilə “Qazprom” şirkətinin İdarə Heyətinin sədri Aleksey Miller arasında baş tutan danışıqlar nəticəsiz qalıb.

Danışıqlar bərpa olunmalıdır, lakin növbəti raundun nə zaman baş tutacağı hələlik məlum deyil.
Vyanadan dönən K. Kaladze yerli mətbuata açıqlamasında bildirib ki, Rusiya tranzit olunan qaza görə ödənişi pulla etmək istəyir: “Lakin biz əvvəlki formada əməkdaşlığın tərəfdarıyıq. Başqa sözlə, tranzit olunan qazın ümumi həcminin 10%-nin alınmasını istəyirik. Rusiya maliyyə hesablaşmasına keçmək niyyətindədir, bu isə bizi qane etmir. Biz öz mövqeyimizi müdafiə edəcəyik”.

Gürcüstanın qaza olan illik tələbatı 2,5 mlrd. kubmetrdir. Bu həcmin əsas hissəsi Azərbaycandan nəql olunur. Qonşu ölkənin enerji balansında təbii qazın payı 40%-dir.
Gürcüstan il ərzində Azərbaycandan 500 mln. kubmetr qaz ala bilir. /APA