“Manat neftin qiymətinin 45-50 dollar səviyyəsində üzməsinə adaptasiya olunub”.

Mediatv.az xəbər verir ki, bunu Milli Məclisdə 2017-ci il dövlət büdcəsinin layihəsinin müzakirəsi zamanı Mərkəzi Bankın İdarə Heyətinin sədri Elman Rüstəmov deyib.

Baş bankir bildirib ki, Azərbaycanda makroiqtisadi sabitliyin təmin olunması və yeni iqtisadi artımı nəzərdə tutan tədbirlər planı üzərində işlənilir:

“Bilirsiniz ki, ölkədə Maliyyə Sabitliyi Şurası yaradılıb. Bu Şurada olduqca ciddi iş, müzakirələr gedir. Şurada gedən müzakirələr makroiqtisadi sabitliyin təmin olunması, struktur və sosial islahat məsələlərini də əhatə edir”.

E.Rüstəmov bildirib ki, cari əməliyyatlar balansı tarazlığa çox yaxındır və sıfıra yaxınlaşdırılıb. Mərkəzi Bankın sədri, həmçinin vurğulayıb ki, kapital əməliyyatları balansında problemlər var: “Buna səbəb çoxdan toplanmış borclardır. Azərbaycan Beynəlxalq Bankının xarici borclanması var ki, onu verməliyik. Bir sözlə, səbəb köhnədən qalmış borc problemidir. Hazırda tədiyyə balansının yeni neft qiymətlərinə uyğunlaşdığını demək çətindir".