Xəbərə görə, azarkeşlərə vəd olunan biletlərin verilməməsinin ardınca daha bir qalmaqal veteran futbolçu İsgəndər Cavadovla yaşanıb.

Belə ki, ABŞ-a yollanacaq heyətdə AFFA İcraiyyə Komitəsinin üzvü İsgəndər Cavadovun da adı olub. Onun üçün bilet və San-Fransiskoda oteldə yer də sifariş olunub.

İsgəndər Cavadov ABŞ-a gedən təyyarəyə də minib. Ancaq sonradan təyyarəni tərk edərək ABŞ-a getməkdən imtina edib. Sportinfo.az saytının verdiyi məlumata görə, təyyarədəki biznes-klassda AFFA-nın baş katibi Elxan Məmmədovun qohumları, dost-tanışları oturduğundan veteran futbolçuya ekonom-klassda yer təklif olunub. Özünə qarşı belə münasibətdən inciyən Cavadov təyyarəni tərk edərək ABŞ-a getməkdən imtina edib.

AFFA-nın Mətbuat və İctimaiyyətlə Əlaqələr Departamentinin rəhbəri Mikayıl Nərimanoğlu “Futbol+” qəzetinə verdiyi açıqlamada Cavadovun hava limanından döndüyünü təsdiqləyib. Ancaq AFFA sözçüsü hadisənin təfərrüatları barədə məlumatsız olduğunu bildirib.