“Çətin oyun olacağını bilirdik. Çünki rəqib çempionluq üçün mübarizə aparan komanda idi. Buna baxmayaraq yaxşı hazırlaşmışdıq. Düşünürəm ki, rəqibə müqavimət göstərə bildik. Yarımfinala vəsiqə qazanmaq istəyirik. Avroliqaya getmək üçün kubok ən rahat yoldur”. 

Bu sözləri “Qafqazinfo”ya açıqlamasında “Xəzər Lənkəran”ın kapitanı Rahid Əmirquliyev deyib. 

O, dünən Azərbaycan kubokunun ¼ final mərhələsində baş tutan “İnter”lə oyun haqqında danışıb. Əmirquliyev 0:2 hesabı ilə uduzduqları matç haqqında bunları deyib: “ Biz onlardan zəif oynamadıq. Sadəcə, onlar qol vəziyyətlərindən yararlana bildilər, biz isə yox. Növbəti mərhələyə şansımız tamamilə itməyib. Ümid edirəm ki, yaxşı olar. Çempionatda iddiamız yoxdur. Kuboku da əldən versək, o zaman mövsümü “Xəzər Lənkəran” üçün bitmiş hesab etmək olar. Amma mübarizə aparacağıq”.