Ötən gecə Yasamal rayonunda fərdi yaşayış evində yanğın baş verib. Hadisə Dadaş Bünyadzadə küçəsində qeydə alınıb. Hadisə barədə məlumat daxil olan kimi əraziyə Fövqəladə Hallar Nazirliyinin yanğınsöndürmə briqadaları cəlb edilib. Yanğın evin elektrik xətlərində baş verdiyindən qısa zamanda mənzili qatı tüstü bürüyüb. Buna görə də sakinlər yanğınsöndürənlər tərəfindən qısa zamanda mənzillərindən təxliyyə edilib.

Fövqəladə Hallar Nazirliyinin məlumatına görə, yanğın zamanı ümumi sahəsi 60 kv.m olan birmərtəbəli 2 otaqlı ev yanıb. Nəticədə evin 1 otağının tavanı 15 kv.m. sahədə və ev əşyaları qismən yanıb. Evin qalan hissəsi və bitişik ev yanğından mühafizə olunub. Hazırda nazirliyin əməkdaşları hadisənin dəqiq səbəblərini müəyyən etmək üçün araşdırmalarını davam etdirirlər. (ans)