Türkiyə Prezidenti Rəcəb Tayyib Ərdoğan rusiyalı həmkarı Vladimir Putinlə Zaporojye AES-i ətrafında məsələni müzakirə etmək istəyir.

Mediatv.az TRT telekanalına istinadən xəbər verir ki, bu barədə Lvovdan qayıdan türkiyəli lider jurnalistlərə müsahibəsində deyib.

“Zelenski bizdən xüsusilə xahiş etdi ki, Rusiya AES ətrafında bütün minaları zərərsizləşdirsin və bunu vəziyyətin təhdid dolu miqyası səbəbindən mümkün qədər tez etsin. Mən Lvovda biz “ikinci Çernobıl” istəmirik deyəndə bunu nəzərdə tuturdum. Sözügedən məsələni hörmətli Putinlə müzakirə etmək niyyətindəyəm. Rusiya bu mühüm addımı sülh naminə atmalıdır”, - Ərdoğan qeyd edib.

Qeyd edək ki, ötən gün Lvovda Ərdoğanla Ukrayna Prezidenti Volodimir Zelenski və BMT baş katibi Antoniu Quterrişin görüşü baş tutub. Tərəflərin razılaşmasına görə, BMT Beynəlxalq Atom Enerjisi Agentliyinin inspektorlarının Zaporojye AES-lə bağlı missiyasını Moskva və Kiyevin bu səfərə razı olacaqları təqdirdə dəstəkləyəcək.