Ukraynanın Borispol şəhərinin meri Vladimir Borisenko sakinləri şəhəri tərk etməyə çağırıb.

Mediatv.az xəbər verir ki, mer bu barədə öz feysbuk səhifəsində videomüraciət paylaşıb.

O qeyd edib ki, bu çağırış həm şəhər sakinlərinə, həm də döyüş əməliyyatlarının getdiyi ərazilərdən gələnlərə aiddir. 

“Mən mülki vətəndaşlara müraciət edərək onlara bizim çağrı mərkəzlərimizə müraciət etməyə və imkan daxilində şəhəri tərk etmələrinə çağırıram. Kimin imkanı yoxdursa, onu şəhərdən çıxaracağıq, kimin imkanı varsa, avtomobil kolonları ilə özünüz şəhəri tərk edə bilərsiniz”, - Borisenko qeyd edib.

O, həmçinin vurğulayıb ki, Borispoldan Ukraynanın qərb vilayətlərinə təxliyə hər gün həyata keçirilir: “Təcrübə göstərir ki, döyüşlərin getdiyi şəhərdə mülki şəxs nə qədər azdırsa, Silahlı Qüvvələr bir o qədər rahat işləyir. Ona görə gəlin belə edək. Hazırda şəhərdə qalmağa ehtiyac yoxdur. Artıq şəhər ətrafında döyüşlər gedir”.