Dünya (25-02-2022, 12:10)
Moldova ukraynalıların ölkəyə girişini sadələşdirdi
Moldova Ukrayna vətəndaşlarının ölkəyə daxil olmasını sadələşdirib.
Mediatv.az xəbər verir ki, bu barədə məlumatı Moldova hökumətinin Mətbuat xidməti yayıb.
Beləliklə, hətta xarici pasportu olmayan Ukrayna vətəndaşları da Moldovaya buraxılacaq. Belə ki, daxili sənədlər əsasında sərhədi keçmək mümkün olacaq. Həmçinin koronavirusla bağlı vaksin sertifikatı olmayan Ukrayna vətəndaşları da Moldovaya buraxılacaq. Uşaqlar isə doğum şəhadətnaməsi, adi pasport və yaxud xarici pasportla ölkəyə daxil ola biləcəklər.
Yerli hakimiyyət orqanları, həmçinin qaçqınların yerləşdirilməsi üçün müvəqqəti mərkəzlər yaradacaq.
Xatırladaq ki, Moldovada Rusiya Silahlı Qüvvələrinin Ukraynaya hücumu ilə bağlı fövqəladə vəziyyət elan olunub. Fövqəladə vəziyyət fevralın 24-dən başlamaqla 60 gün davam edəcək.