Türk PUA-ları Rusiyada da istehsal olunacaq - AÇIQLAMA

Dünya (2-04-2021, 13:20)
Türk PUA-ları Rusiyada da istehsal olunacaq - AÇIQLAMA

Türkiyənin dünyaca məşhur "Bayraktar TB2" PUA-ları bundan sonra Rusiyada da istehsal olunacaq.
"Türk Havacılık Haberleri"nin verdiyi məlumata görə, "Bayraktar TB2" pilotsuz uçuş aparatının istehsalçısı "Baykar" qrupuna daxil olan "Baykar Defence" şirkəti Rusiyanın Nijni-Novqorod şəhərindəki "Novıe Bespilotnıe Sistemı" (NBS) ASC ilə əməkdaşlıq anlaşması imzalayıb.
NBS şirkəti Rusiyanın müdafiə sistemləri və hərbi texnika sənayesi bazarında hələ ki, yeni və çox tanınmayan şirkətdir.

NBS "Bayraktar TB2" PUA-larını Rusiyanın Müdafiə Nazirliyində hazırlanan yerli PUA-lara alternativ qismində təklif etmək niyyətindədir. Daha konkret desək, Rusiyada istehsal ediləcək "Bayraktar TB2" hazırda Yaroslav şəhərindəki "Luç" Konstruktor Bürosunun layihəsi olan "Korsar" döyüş PUA-sına alternativ sayılır.

Hazırda "Bayraktar TB2"-də Qərb ölkələrində istehsal olunmuş avadanlıq və qurğulardan geniş istifadə olunur. Qərblə Rusiya arasında münasibətlər həddən ziyadə gərgin olduğundan Moskvaya qarşı istənilən an yeni sanksiyalar tətbiq oluna bilər və bu durum "Bayraktar TB2"lərin Rusiyada istehsalında çox ciddi problemlər yarada bilər. Ona görə də Rusiya Müdafiə Nazirliyinin əsas şərti ölkədə istehsal ediləcək "Bayraktar TB2" PUA-larının əsasən Rusiya və Çin istehsalı olan avadanlıqla təchiz olunmasıdır.

Rusiyada istehsal ediləcək, şərti adı "Baykar Defence" və ya "Bayraktar TB2-R" olacaq PUA-ların eksperimental modelinin uçuş sınaqları isə Türkiyədə keçiriləcək.

Qarabağ müharibəsindən də aydın oldu ki, "Bayraktar"lar bütün Rusiya istehsalı olan silahlara qalib gəldi. Türkiyə ilə Rusiyanın hazırda nə qədər səmimi münasibətləri olsa da onlar bir-biri ilə daim açıq mübarizədə olublar. İndi Türkiyənin Rusiya ilə razılığa gəlib Nijni-Novqorodda sözügedən PUA-ların istehsalına başlaması Türkiyənin öz əli ilə rus ordusunu gücləndirməsi deməkdir.

Məsələ haqqında hərbi ekspert, polkovnik Şair Ramaldanov "Şərq"ə fikir bildirərkən Rusiya ilə Türkiyə münasibətlərinin yaxşılaşmasının Azərbaycan üçün müsbət olduğunu vurğuladı:

"Bizimlə əlaqəsi olan ölkələr arasında dostluq münasibətləri nə qədər inkişaf etsə, o qədər də Azərbaycan bundan istifadə edə biləcək.

Bu, hərbi-texniki əməkdaşlıqdır. Hər bir dövlət bu əməkdaşlığı edərkən əlbəttə ki, öncə öz mövqeyindən və marağından çıxış edir. Təbii haldır ki, Rusiya ilə Türkiyə arasında hərbi əməkdaşlıq inkişaf edir.

Hərbi əməkdaşlıq və hərbi texnika elm kimi bir yerdə dayanmayıb. İndiyə kimi digər PUA-lar olub. Amma indi "Bayrakdar" var. Gələcəkdə başqa bir şeylər yaradılacaq.

Türkiyə-Rusiya münasibətləri nə qədər yaxşı və sabit olsa, bu, Azərbaycan üçün son dərəcə müsbət haldır. Çünki Türkiyə bizə qardaş ölkədir. Rusiya ilə də strateji əməkdaşlığımız var. Buna görə də bizə yaxın olan hər iki ölkənin hərbi sahədə yaxınlığının ən çox bizə xeyri var".

Ekspert Ş.Ramaldanov Türkiyə və Rusiya əlaqələrinin Qarabağ müharibəsində də bizə müsbət təsirindən danışdı:

"Azərbaycanla işğalçı Ermənistan arasında baş verən son müharibədə məhz Türkiyənin vasitəsi ilə biz Rusiyanın müəyyən şəkildə neytral mövqe tutmasını təmin etdik. İndi bəziləri düşünür ki, Rusiya bu silahları Ermənistana verə bilər. Lakin mən belə düşünmürəm. Çünki hərbi sahədə ciddi addım atılanda sazişlərdə müəyyən məhdudiyyətlər qoyulur".

Dünya (2-04-2021, 13:20) Türk PUA-ları Rusiyada da istehsal olunacaq - AÇIQLAMA

Dünya (2-04-2021, 13:20)
Türk PUA-ları Rusiyada da istehsal olunacaq - AÇIQLAMA