AMEA-nın Məhəmməd Füzuli adına Əlyazmalar İnstitutunun elmi şurasının qərarı ilə XIX-XX əsrdə yazıb yaratmış görkəmli Azərbaycan şairi Mirzə Ağadadaş Münirinin əsərləri çap olunmuşdur. Kitab Bakı şairlərinin bir araya gəldiyii məşhur “Məcməüş-şüəra” məclisinin ən fəal üzvlərindən olan M.A.Münirinin 155 illik yubileyinə həsr olunmuşdur. Xatırladaq ki, M.A.Münirinin “Bahar ağlayışı” adlı yeganə şeirlər kitabı 1926-cı ildə işıq üzü görmüşdür. Lakin şairin yeni kitabına Məhəmməd Səid Ordubadinin arxivindən əldə edilmiş 15 beytlik “Ədibimiz Məhəmməd Səid Ordubadiyə təbrik” məsnəvisi daxil edilmiş və “Bahar ağlayışıi” kitabında yol verilmiş bir çox xətalar aradan qalıdırılmışdır. Kitab qəzəllər, müxtəlif şeirlər, rübailər, mənzum məktublar və məqalələr adlı bölmələrdən ibarətdir.

Mirzə Ağadadaş Münirinin “Əsərlər”i adlı bu kitaba Əlyazmalar İnstitutun böyük elmi işçisi, Azərbaycan Yazıçılar Birliyinin “İrs” Komissiyasının sədri Sona Xəyal geniş ön söz yazmışdır. Ön sözdə kitab üzərində iş prosesindən, M.A.Münirinin həyat və fəaliyyətindən, övladlarından bəhs edilir. Kitabın redaktorları Rauf Şeyxzamanlı və Seyyid Məcid Əsri, rəyçiləri isə fil.ü.f.d. Vərağa Almasov və Qutiyera Cəfərovadır.

Kitab “Ecoprint” nəşriyyatında işıq üzü görmüşdür.

İctimaiyyətlə əlaqələr şöbəsi