27 iyul 2017-ci il tarixində “John Deere” şirkətinin regional nümayəndəsi Maximilian Pauge Azərbaycan Dövlət Aqrar Universitetinə (ADAU) səfər edib. Səfərin məqsədi şirkətin fəaliyyəti üçün ADAU-da xüsusi otaq ayrılmasını, servis xidmətinin yaradılması, texnika üçün kadr hazırlığı və kadrların şirkətdə təcrübə keçməsi məsələlərini müzakirə etmək olub. 

Qonağı salamlayan universitetin rektoru, AMEA-nın müxbir üzvü, professor İbrahim Cəfərov kənd təsərrüfatı mütəxəssislərinin, o cümlədən aqromühəndis kadrların hazırlanmasına dövlət dəstəyinin istiqamətlərini,  “John Deere” şirkəti ilə əməkdaşlığın vacibliyini, hazırda universitetin bir qrup tələbəsinin şirkətin texnikaları ilə taxıl biçini prosesində iştirak etdiyini qeyd edib.

Görüşdə pambıq yığımı mövsümünün başlanmasına qədər şirkətin nümayəndələri tərəfindən ilk növbədə müəllimlər üçün bütün texnoloji prosesləri əhatə edən təlimlərin keçirilməsi barədə razılığa gəlinib.

Sonra qonaqlar universitetin maddi-texniki bazası ilə yaxından tanış olub, şirkət üçün ayrılacaq otaq və yerlərə baxış keçiriblər.