Mediatv.az:   Ötən gün “Qafqazinfo”da “Palmali” Şirkətlər Qrupunun prezidenti Mübariz Mənsimovun ABŞ prezidenti Donald Trampla görüşünü əks etdirən məlumat və fotolar yayımlanmışdı.

Sayt bu gün açıqlama yayıb ki, sözügedən xəbər və fotolar sayta “Palmali”nın mətbuat xidmətinin rəhbəri Hüseyn Cəbrayıloğlu tərəfindən göndərilib. Xəbər yerləşdirildikdən sonra məlum olub ki, təqdim olunan fotolardan ikisi fotoşopla hazırlanıb və Trampla Mənsimov “yan-yana gətirilib”.

Sözügedən fotolar müzakirələrə səbəb olub və bu saxtakarlıq sosial şəbəkələrdə pislənilib. Saytın məsələ ilə bağlı şirkətə müraciət etməsinə baxmayaraq, həmin fotoların orijinal olduğunu iddia ediblər. Lakin “Qafqazinfo” fotonun haqlı olaraq etirazla qarşılandığını nəzərə alıb və onu saytdan silib.

Bununla yanaşı, sayt "Palmali" şirkətinin rəhbərliyini məsuliyyətli olmağa çağırıb və yanlışlığa görə oxuculardan üzr istəyib.