Daxili İşlər Nazirliyinin mətbuat xidmətinin rəis müavini Ehsan Zahidov “Polisə sağ gedən niyə salamat qayıtmır?” başlıqlı yazıya reaksiya verib.

Mediatv.az xəbər verir ki, E. Zahidovun adından “Qafqazinfo”ya daxil olan açıqlamada bildirilir ki, “Bizim yol” qəzetinin internet səhifəsində yerləşdirilmiş və “Qafqazinfo.az”in da paylaşdığı “Polisə sağ gedən niyə salamat qayıtmır?” adlı məqaləni oxuduqdan sonra belə qənaətə gəlib ki, yazmağa mövzu tapmayan müəllif Ramid İbrahimov uzağa getmədən, oturduğu yerdəcə özündən saxta və süni “problem” uyduraraq müzakirəyə çıxarıb: “3-4 bekar vəkili, hüquqşünası, eksperti də qoşub bu uydurma, əldəqayırma “problem”in müzakirəsinə və xorla deyirlər ki, polis səhlənkardı, polis adam döyəndi və s.”.

E. Zahidov bildirib ki, yazı müəllifi daxili işlər orqanlarının fəaliyyəti ilə bağlı əsassız və uydurma yazılar yazmaqda artıq “püxtələşib”: “Sanki o, polisin mətbuata qarşı dözümlülüyündən, humanistliyindən sui-istifadə etməklə asayiş keşikçiləri barədə əsassız yazılarına son qoymaq istəmir.

Görünür, unudub ki, bizim də məhkəmələrə müraciət etmək hüququmuz var. İkincisi, onun və onun sualını cavablandıran yoldaşların nəzərinə, özü də əminliklə, çatdırmaq istərdim ki, bu günə qədər Azərbaycanda polisin zorakılığı, döyməsi nəticəsində adam ölməsi faktı ümumiyyətlə qeydə alınmayıb, yəni olmayıb.

Düzdü, olub ki, hardasa polis orqanının inzibati binasında və ya binanın həyətində kimsə vəfat edib. Amma bu o demək deyil ki, onu polis döyüb öldürüb. İnsan bilmir ki, o sabah harada öləcək. Əcəl onu şadlıq sarayında da, JEK-də də , xəstəxanada da, polisin inzibati binasında da haqlaya bilər. Onda belə çıxır ki, kim harda vəfat edirsə, deməli, onu oranın işçiləri öldürüb…? Məntiqsizlikdir…. Özü də nə mətbuat nümayəndəsinə, nə də özünü hüquqşünas hesab edənlərə yaraşmayan ən böyük məntiqsizlik….

Yazıda nümunə kimi mayın 12-də Xəzər RPİ-nin 1-ci Polis Bölməsinin həyətində (!) vətəndaşın qəfl ölməsi faktına da toxunulur. Bir daha (çünki hadisə olan günü DİN-in və Baş Prokurorluğun mətbuat xidmətləri rəsmi məlumat yaymışdılar) həmin fakta qayıdaraq bildirirəm ki, mərhum başqa bir vətəndaşın şikayəti əsasında poli bölməsinə dəvət olunub. Tədqiqatçının yanına keçmək üçün həyətdəki oturacaqda oturub növbəsini gözləyirmiş. Həyəcandanmı, stressənmi, havadanmı, dəqiq deyə bilmərəm, infarkt keçirərək oturacaqdan ağzı üstə yerə çırpılıb və dünyasını dəyişib. Burda polisi günahlandırmaq, ondan şübhələnmək nə dərəcədə ədalətlidir. Bəli, hər bir peşə sahəsində olduğu kimi polis əməkdaşı da yorğunluqdan, yuxusuzluqdan, əsəbdən səhlənkarlığa, ehtiyatsızlığa, kobud rəftara yol verə bilər, çünki o da insandı.

Buna baxmayaraq hər belə fakt qeydə alınanda dərhal DİN rəhbərliyinin birbaşa nəzarəti altında xidməti təhqiqatlar və digər zəruri araşdırmalar həyata keçirilir. Əgər, əməkdaşın günahı təsdiqlənirsə, o daxili işlər orqanlarında xidmətdən xaric olunmaya qədər cəzasını alır. Lakin kiminsə əcəli polis bölməsinin həyətində tamam olursa, coxdan daşıdığı hansısa xəstəskdən, həyəcandan, stressdən vəfat edirsə buna polis neyləsin? Belə hallarda polis təcili-tibbi yardım çağıra bilər ki, onu da həmişə edib…

Yazıdakı əsassız iddialardan birini də vəkil Adəm Məmmədov deyir. Yəqin ki hüquqşünas olan bu adam, KİV-ə verdiyi açıqlamanın məsuliyyətini unudaraq və konkret fakt göstərmədən deyir ki, “… yiyəsi və vəkili olmayan bir şəxs oğurluq edirsə, Bakı şəhərində baş verən və açılmamış oğurluq hadisələrinin hamısını onun adına rəsmiləşdirirlər.…”

Olduqca gülünc və cəfəngiyyatdan ibarət olan bu “vəkil tapıntısı”na isə münasibət bildirməyi özümə rəva görmürəm. Bircə onu fəxrlə deyirəm ki, Azərbaycan hüquqi-demokratik bir dövlət olaraq insan haqları ilə obyektiv və qərəzsiz məşğul olan bütün beynəlxalq təşkilatların hesabatlarında dünyanın əksər dövlətlərinə bu sahədə də nümunə olacaq bir dövlət kimi göstərilir. Tam əminliklə deyirəm ki, bizdə həbs olunan hər bir şəxs törətdiy konkret qanunazidd əməlin - hadisənin, cinayətin qanuni cəsasını alır. İstintaq orqanlarının ünvanına belə əsassız fikirlər səsləndirən vəkil, görünür, bəzən maddi marağını güdərək hansısa cinayətkarın müdafiəsinə cəhd göstərir və onu qanunun əlindən ala bilməyəndən sonar bu cür hədyanlara əl atır.

Son olaraq onu da deyim ki, belə uydurma yazılar, kiminsə hansısa səbəbdən vəfat etməsi faktının KİV-də əsassız olaraq müzakirəsi, təkcə hüquq-mühafizə orqanlarının işgüzar imicinə, fəaliyyətinə kölgə salmır, həm də, mərhumun ruhuna, onun yaxınlarının dərdinə hörmətsizlikdir”.