Ədliyyə Nazirliyinin Penitensiar Xidmətinin Tərbiyə Müəssisəsində tərbiyə alan 3 məhkum Xalça Muzeyində qonaq olub. Haftaa.z bildirir ki, müəssisənin rəisi Araz Rzayevin rəhbərliyi ilə 17 yaşlı Əliyev Rəşad, Allahverdiyev Həsən və Qəhrəmanov Əli adlı məhkumlar muzeyi ziyarət edib. Onlar cəza çəkdikləri müddətdə nümunəvi davranış sərgilədiklərinə və müəssisədaxili təhsildə xüsusi fərqləndiklərinə görə müəssisədən kənar gəzintiyə çıxarılıb.

Gənc məhkumlar Azərbaycan Xalça Muzeyində qədim xalça nümunələri və digər eksponatlarla tanış olublar. Gənc məhkumlara Azərbaycan xalçasının tarixindən bəhs edən film nümayiş olunub, xovlu-xovsuz xalçalar, keramik qablar, bədii metal və zərgərlik məmulatları barədə məlumat verilib. Daha sonra gənclər Uşaq Muzeyində “Öz xalçanı yarat” kompüter oyununda hazır naxışlardan istifadə edərək xalça kompozisiyası yaradıblar.

Sonda onlara “Azərbaycan Xalçası və Xalq Tətbiqi Sənəti muzeyinin təhsil proqramları”, “Azərbaycan Xalçaları”, jurnalları və bukletlər hədiyyə olunub.

Hafta.az