Ermənilər “komandos” ləqəbi qoyduqları Arkadi Ter-Tadevosyanın 75 illiyini qeyd edirlər. Əksər erməni saytları bizlərin “meşə tülküsü” adlandırdığı bu general barədə yazılar dərc edir. Fakt faktlığında qalır ki, sovet dövründə Bakıda Ümumqoşun Komandirlər məktəbini bitirmiş, neçə il Azərbaycanın havasını-suyunu udmuş, çörəyini yemiş həmin “tülkü” 1992-ci il mayın 8-9-da ermənilərin Qarabağ ordusunun komandanı kimi qurduğu plan əsasında əsrlər boyu heç bir cahangirin zəbt edə bilmədiyi Şuşanı işğal etdi.
Amma düşmən olsa da, general-mayor Ter-Tadevosyan son müsahibələrində bir sıra həqiqətləri etiraf edib. Deyib ki, Şuşanı “azad etdikdən” sonra ağlayıb. Çünki hücum zamanı şəhəri müdafiə edən az saylı Azərbaycan döyüşçüləri yüzlərlə erməni əsgərini məhv edib. Təəssüf ki, Azərbaycanda bəziləri hələ də Şuşanın döyüşmədən təslim edildiyini söyləyirlər.
Azərbaycan üçün bir acı həqiqət də ondan ibarət olub ki, Şuşaya hücumu müşayiət etmək üçün Xankəndi yaxınlığındakı Şuşikəndə 72 yüksək rütbəli erməni general və zabiti toplaşıb. Bizim isə nə Şuşa, nə də Laçında bir generalımız belə, görünməyib.