1978-ci ildən helikopter mühərriklərinin təmirini həyata keçirən, Müdafiə Nazirliyinin nəzdində N saylı hərbi hissə kimi fəaliyyət göstərən Gəncə Aviasiya Təmiri Zavodu və onun direktoru Hacı Etibar Həsənovla bağlı redaksiyamıza kifayət qədər ilginc bilgilər daxil olduğundan onları sizlərlə paylaşmaq istərdik.

Mediatv.az:   Beləliklə, adıçəkilən zavodun əsas fəaliyyətinin vertolyotların mühərriklərinin təmiri ilə bağlı olduğunu vurğulayan məlumatlı şəxsin Gundelik-Baku.com-la bölüşdüyü informasiyada deyilir ki, Gəncə Aviasiya Təmiri Zavodunun aylıq gəliri 2-3 milyon manat həcmində hesablanır.

Gəncə Aviasiya Təmiri Zavodu Etibar Həsənov üçün əlverişli yeyinti mənbəyidir

Mənbənin sözlərinə görə, bu, onu göstərir ki, adıçəkilən müəssisə Hacı Etibar Həsənov üçün olduqca əlverişli yeyinti mənbəyidir: «Deyilənlərə görə, zavodda təmir olunan mühərrik və reduktoların hərəsinin öz təmir qiymətləri var. Bu xidmətin qaşılığında zavodun büdcəsinə külli miqdarda vəsait köçürülür. Bildirilir ki, həmin vəsaitlərin böyük bir hissəsi direktor Hacı Etibar Həsənovun şəxsi büdcəsinə yönəldilir. Hər ay ən azı 10 mühərrik və ya reduktor təmir olunduğunu nəzərə alsaq, o zaman zavodun aylıq gəlirinin milyonlarla ölçüldüyünü demək olar. Məsələnin maraqlı tərəfi ondadır ki, bu qədər gəlirin qarşılığında zavod rəhbərliyi işçilərə olduqca az əməkhaqqı verir. Elə isə bu qədər vəsaitin hara və necə xərclənməsilə bağlı ortaya ciddi suallar çıxır».

Onun oğlu Orxan Həsənov dəbdələi həyat tərzi ilə seçilir

Gəncə Aviasiya Təmiri Zavodunun direktorunun sabiq milli təhlükəsizlik naziri Eldar Mahmudovun köməkçisi və əmisi oğlu Vüqar Mahmudovla yaxın münasibətdə olduğunu iddia edən məlumatlı şəxs qeyd edir ki, Hacı Etibar Həsənov məhz bu səbəbdən uzun müddət üzləşdiyi problemləri asanlıqla yoluna qoymağı bacarıb: «Deyilənlərə görə, Eldar Mahmudovun köməkçisi və əmisi oğlu Vüqar Mahmudov Gəncə Aviasiya Təmiri Zavodunun direktoru Hacı Etibar Həsənova «krişa»lıq edib. Buna görə də adıçəkilən müəssisənin rəhbəri heç kimdən və heç nədən çəkinmədən uzun müddət öz bildiyini edib. Onu da nəzərinizə çatdırım ki, Hacı Etibar Həsənovun hazırda Gəncədə bir neçə oteli, nəhəng biznes strukturları var. Onun oğlu Orxan MTN-də məsul vəzifədə çalışıb. Bildirilir ki, bu məsələdə Hacı Etibar Həsənova Vüqar Mahmudov yaxından köməklik göstərib. Yeri gəlmişkən qeyd edim ki, zavod direktorunun oğlu Orxan Həsənov gecələr bar «Park İNN»də olur. Ümumiyyətlə, onun oğlu dəbdələi həyat tərzi ilə seçilir. Hazırda Azərbaycanda Hacı Etibar Həsənov qədər pullu, imkanlı şəxs çox az adam tapılar».

Zavod direktorunun Çexiyada Marinskdə kazinoyla üz-üzə dəyəri milyonlarla ölçülən əzəmətli evi var

Əldə etdiyimiz bilgilərdə həmçinin, o da qeyd olunur ki, bir müddət əvvəl Gəncə Aviasiya Təmiri Zavodunda nə az, nə çox düz 5 milyardlıq yeyinti olub. Buna görə birbaşa Hacı Etibar Həsənovun məsuliyyət daşıdığını deyən mənbənin bildirdiyinə görə, zavod direktoru külli miqdarda sərvətə sahib olsa da, nədənsə onun adı heç yerdə hallanmır: «Deyilənlərə görə, o, bir müddət əvvəl sabiq rabitə və yüksək texnologiyalar naziri Əli Abbasovla əlaqəyə girərək Gəncədə yerləşən 2 saylı 52 ATS alıb və yerində «Məşədi İbad» hamamı, otel tikdirib. Bildirilir ki, onun Çexiyada Marinskdə kazinoyla üz-üzə dəyəri milyonlarla ölçülən əzəmətli evi var. Qeyd olunur ki, Hacı Etibar Həsənov bu qədər sərvətə məhz Gəncə Aviasiya Təmiri Zavodunda aparılan şişirtmələr, yeyintilər hesabına yiyələnib».

O, mərhum general-leytenant Rail Rzayevin zamanında da külli miqdarda yeyintiyə yol verib

Hacı Etibar Həsənovun Azərbaycan Respublikası müdafiə nazirinin müavini, Hərbi Hava Qüvvələrinin və Hava Hücumundan Müdafiə Qoşunlarının komandanı, mərhum general-leytenant Rail Rzayevin zamanında da külli miqdarda yeyintiyə yol verdiyini iddia edən məlumatlı şəxsin sözlərinə görə, həmin dönəmlərdə bu məsələnin üstü açılsa da, Gəncə Aviasiya Təmiri Zavodunun direktoru ilə bağlı heç bir ölçü götürülməyib: «Deyilənlərə görə, həmin vaxt Hacı Etibar Həsənovun dadına yenə də Eldar Mahmudovun köməkçisi və əmisi oğlu Vüqar Mahmudov çatıb. Belə ki, onun müdaxiləsindən sonra zavod direktorunun iştirakçısı olduğu yeyinti faktı ört-basdır edilib və Etibar Həsənov heç nə olmamış kimi işinə davam edib. Onu da nəzərinizə çatdırım ki, Gəncə Aviasiya Təmiri Zavodunun direktoru və yaxınlarının sürdüyü ən ucuz avtomobilin qiyməti 100-200 min manat təşkil edir. Hələ bu, harasıdır. Bildirilir ki, o, rəhbərlik etdiyi müəssisədə ən mühüm postlara məhz öz adamlarını təyin edib».

Hacı Etibar Həsənovu həbsdən kim və necə qurtarıb?

Başqa bir informasiyada isə deyilir ki, Gəncə Aviasiya Təmiri Zavodunun direktoru Hacı Etibar Həsənov bir neçə il əvvəl həbs olunsa da, qısa müddət sonra müəmmalı şəkildə həbsdən azad edilib: «Deyilənlərə görə, bu işdə də ona Vüqar Mahmudov və himayəsində olduğu digər nüfuzlu şəxslər yaxından köməklik göstərib. Bir məqamı da diqqətinizə çatdırım ki, Hacı Etibar Həsənovun «Porche-Bakı mərkəzi», «Bank of Azerbayijan», «Mango» mağazalar şəbəkəsi, «Neon» firması və digər biznes strukturları ilə yaxın əlaqələri var. Hazırda bununla bağlı araşdırmalarım davam edir. Odur ki, tezliklə ətraflı məlumat verməyə çalışacağım. Lakin ümid edirəm ki, ölkənin hüquq-mühafizə orqanları, polis, prokurorluq, Korrupsiyaya Qarşı Baş Mübarizə İdarəsi tezliklə qeyd olunan faktlarla bağlı müvafiq tədbirlərə baş vuracaq. Çünki ortada olduqca ciddi yeyinti ilə bağlı məqamlar mövcuddur».(Gundelik-Baku.com) 

Mövzu ilə əlaqədar qarşı tərəfin də mövqeyini işıqlandırmağa hazırıq.