Dövlət Turizm Agentliyi 1 milyon manatdan çox dəyəri olan növbəti tenderini elan edib. Bu dəfə söhbət Cənubi Asiya və MDB ölkələrində Azərbaycanın turizm imkanlarının təbliğat xidmətlərinin satın alınmasından gedir.
Yenicag.az xəbər verir ki, Agentlik tərəfindən elan edilən “Cənubi Asiya və MDB ölkələrində 2026-cı il üçün təbliğat xidmətlərinin yerinə yetirilməsi” müsabiqəsinin ehtimal olunan qiyməti 1 milyon 204 min 375 manat təşkil edir. Tender çərçivəsində Hindistanda təmsilçilik xidmətlərinin göstərilməsi, həmçinin Hindistan, Pakistan, Özbəkistan və Qazaxıstanda “Roadshow” formatında B2B tədbirlərin təşkili nəzərdə tutulur. Təkliflərin qəbulu 16 aprel 2026-cı il tarixinədək davam edəcək.
Bununla belə, satınalma sənədlərində xidmətlərin dəqiq məzmunu və gözlənilən nəticələr barədə detallı göstəricilərin məhdud olması müəyyən suallar doğurur. Texniki tapşırığın əsasən ümumi ifadələrlə təqdim edilməsi potensial iştirakçılar üçün görüləcək işlərin real həcmini və xərclərin əsaslandırılmasını qiymətləndirməyi çətinləşdirə bilər. Bu isə tender prosesində şəffaflıq və səmərəlilik məsələlərinin müzakirə olunmasına səbəb olur.
Digər tərəfdən, layihənin dəyərinin 1 milyon manatdan artıq olması və bir neçə ölkədə paralel tədbirlərin planlaşdırılması büdcə səmərəliliyi mövzusunu gündəmə gətirir. Ekspertlər hesab edir ki, belə təşviqat layihələri üzrə turizm axınının artımı və bazar nəticələri kimi konkret, ölçülə bilən göstəricilərin əvvəlcədən müəyyənləşdirilməsi vacibdir. Əks halda, ayrılan böyük məbləğdə vəsaitin turizm sektoruna real təsirinin qiymətləndirilməsi çətin ola bilər.шаблоны для dle 11.2