Ədliyyə Nazirliyi fiziki şəxs Ağalarov Namiq Sakit oğlu (VÖEN – 3100164952) ilə satınalma müqaviləsi bağlayıb.
Yeniavaz.com xəbər verir ki, nazirlik müqaviləni tender müsabiqəsi keçirmədən, bir mənbədən satınalma metodu əsasında imzalayıb.
Qeyd edək ki, müqavilənin şərtlərinə görə, Ədliyyə Nazirliyi Abşeron rayon icra və probasiya şöbəsi üçün Xırdalan şəhəri Heydər Əliyev prospekti 251 A ünvanında yerləşən, ümumi sahəsi 584.7 kv. metr olan qeyri-yaşayış binasını icarəyə götürəcək.
Nazirlik 14 yanvar 2026-ci il tarixindən 31 dekabr 2026-ci il tarixinə kimi Ağalarov Namiq Sakit oğluna icarə haqqı olaraq 42 min manat ödəyəcək.
Məlumat üçün bildirək ki, Ağalarov Namiq Sakit oğlu eyni zamanda 1200 manat nizamnamə kapitalı olan və 17 mart 2022-ci il tarixində dövlət qeydiyyatına alınan "Kristal AA İnşaat" MTK-nın (VÖEN – 3104220131) qanuni təmsilçisidir.
Onu da qeyd edək ki, Ədliyyə Nazirliyi daha əvvəl də paytaxt Bakıda və müxtəlif rayonlarda fəaliyyət göstərən onlarla qurum üçün ofis sahələri və bəzi məhkəmələr üçün inzibati binalar icarəyə götürüb.шаблоны для dle 11.2