Bu ilin fevralında Dövlət Avtomobil Nəqliyyatı Xidməti (DANX) etiraz olaraq Bakıda yolu bağlayan 4 TIR sürücüsündən biri, eyni zamanda TIR-ların məxsus olduğu daşıma şirkətinin rəhbəri Rəmiş Cəfərovun məhkəməsi başlayır.

Mediatv.az xəbər verir ki, o atası Zəkrəm Cəfərovla birlikdə dələduzluq etməkdə ittiham olunur. Onların barəsində abaşladılan cinayət işinin istintaqı tamamlanıb və baxılması üçün Bakı Ağır Cinayətlər Məhkəməsinə göndərilib. İşə hakim Azər Paşayevin sədrliyi ilə baxılacaq. İş üzrə 5 nəfər zərərçəkmiş qismində tanınıb.

Qeyd edək ki, yükdaşıma xidmətləri ilə məşğul olan "R Group Azerbaijan" şirkətinin rəhbəri Rəmiş Cəfərov Belarus vətəndaşı Yuriy Qnoyanikə məxsus 37 min dollarlıq yükü ələ keçirməkdə təqsirli bilinir. Bundan başqa dörd sahibkara məxsus ümumilikdə 68 dollarlıq məhsulun daşınması üzrə də onlara maddi ziyan vurduğu üzə çıxıb.

Qeyd edək ki, fevralın 17-i səhər saatlarında "R Group Azerbaijan" şirkətinin sürücüləri Heydər Əliyev prospektində yolu bağlamış, nəticədə saatlarla süni tıxac yaranmışdı. Onlar DANX tərəfindən müavfiq icazə vərəqələrini verilmədiyini iddia edirdi.