Bunu Modern.az-a açıqlamasında Müsavat Partiyasının Divan üzvü Tural Abbaslı deyib. Onun sözlərinə görə, Müsavat funksionerləri, sıravi partiya üzvləri İsa Qəmbərin başqan kimi qalmasını istəyirlər:

“İsa bəy isə bu məsələdə prinsipial mövqe sərgiləyir. O, nizamnaməyə uyğun olaraq, 3-cü dəfə namizədliyini vermək niyyətində deyil. Ona görə də bu məsələ partiya daxilində həll edilmiş hesab olunur. Qurultaydan sonra İsa bəy partiyanın üzvü olaraq qalacaq”.

T.Abbaslı qeyd edib ki, nizamnamədə dəyişikliklər edilsə, də, İsa Qəmbər namizədliyini irəli sürməyəcək:

“Nizamnamədə dəyişikliyi qurultay edə bilər. Hər qurultayda nizamnaməyə əlavə və dəyişiklər olur. Amma bu bəndlə bağlı inanmıram ki, dəyişiklik edilsin. 600-ə yaxın qurultay nümayəndəsi var, ola bilər, səsvermə yolu ilə həmin müddəa dəyişsin. Müddəa dəyişilsə belə, İsa Qəmbərin namizədliyini irəli sürəcəyinə inanmıram”.

Qeyd edək ki, Müsavat Partiyası mayın 24-də VIII qurultayını keçirməyi planlaşdırır. Partiya qurultayın keçirilməsi üçün Bakı Şəhər İcra Hakimiyyətinə (BŞİH) müraciət edib.