İranda rəsmi səfərdə olan Türkiyənin baş naziri Əhməd Dağudoğlu regionda dini düşmənçiliyə son qoymaq üçün hər iki ölkənin gələcəyə hesablanmış ümumi perspektiv tədbirlər üzərində işləməsinin vacibliyini vurğulayıb.

“Reuters”in məlumatına görə, bu il hər iki ölkənin uğurlu seçkilər keçirdiyini xatırladan baş nazir onu da bildirib ki, bu gün Türkiyə ilə İran arasında əməkdaşlıq üçün müsbət atmosfer mövcuddur.

Əhməd Davudoğlu İranın I vitse-prezidenti İshaq Cahangiri ilə keçirdiyi mətbuat konfransında, həmçinin xatırladıb ki, xarici işlər naziri işlədiyi dövrdə İranın nüvə proqramına dair problemin həlli üçün çalışıb və artıq problem həllini tapıb: “Nüvə məsələsinə görə, ağır günlərdə olduğu vaxtda biz İranın yanında idik. İrana qarşı beynəlxalq təzyiqlər və sanksiyaların ləğvinə ən çox biz sevinirik. Mümkündür ki, İranla bəzi məsələlərdə fikir ayrılığımız olsun. Lakin iki ölkə arasında qədimi qonşuluq tarixi və bir-birini tamamlayan coğrafiya var. Əgər Türkiyənin təcrübəsi və İranın gözəlliyi birləşərsə hər iki ölkə turizm sahəsində ən böyük gücə çevriləcək” (Virtualaz.org).