Mediatv.az ANS TV-də yayılan həmin müsahibəni təqdim edir:

-Rövnəq müəllim, harasa hazırlaşırsınız. Hara gedirsiniz?

-Misirə uçuruq. Biz artıq 4 ildir ki, orada kəşfiyyatla məşquluq. Biz bu gün Misiri böyük miqdarda yanacaq və neft məhsulları ilə təmin edirik.

-Gürcüstana necə gedib-gəldiniz?

-Çox gözəl və böyük nəticələri oldu bu səfərin. Cənab prezidentin ora səfəri çox yüksək səviyyədə keçdi. Ən əsası orada yaşayan azərbaycanlıların əhval-ruhiyyəsi, inamı artdı. Bu gün tarixdə olmayan bir şeydir ki, minlərlə azərbaycanlı gənc gürcü dilində təhsil alır. Dövlət başçısının göstərişi ilə biz onların orada təhsilini maliyyələşdiririk, həm də onları təqaüdlə təmin edirik ki, bu da bir neçə ildən sonra Gürcüstan içtimaiyyətində azərbaycanlıların rolunu və imkanlarını artırmış olacaq. Bu gün Azərbaycan kəndlərinin sosial-iqtisadi inkişafı üçün cənab prezident çoxlu işlər görür. Bu gün biz harda qazlaşdırma işləri aparırıqsa, çalışırıq ki, orada məktəbləridə, yolları da təmir edək. Bu kəndlərdə yaşayan azərbaycanlıların da Azərbaycana inam yaranır, qorxusuz həyata inam yaranır. Onlar görürlər ki, cənab prezident onların arxasındadır. Həmin görüşdə onlar bunu öz çıxışlarında da bildirdilər. Kənd camaatı prezidentə şikayət etmişdi ki, onların məhsulları əllərində qalır, onlardan məhsulu ucuz qiymətə alırlar. Prezidentin göstərişi ilə biz və bir neçə iş adamı orada Gürcüstanın ən böyük soyuducu qurğusunu tikdik. Artıq Marneuli, Dmanisi və Bolnisidə azərbaycanlıların yaşadığı kəndlərin sakinləri öz məhsullarını burada saxlaya və bir neçə aydan sonra baha qiymətə sata bilərlər.

İndi isə yerli biznesin inkişafı üçün bir sıra layihələrin həyata keçirilməsinə dair göstəriş verilib. Biz orada konserv sənayesini inkişaf etdirməyi planlaşdırırıq ki, soydaşlarımız orada öz təsərüfatlarını inkişaf etdirməyi bacarsınlar. Bu da onların maddi imkanını rifahlandırmaq üçün çox gözəl imkanlar yaradacaq.

-Rövnəq müəllim, səfər ərəfəsində və elə səfərin gedişatında da şayiələr gəzirdi ki, Gürcüstan Rusiyadan və İrandan qaz almağa hazırlaşır. Bu, nə dərəcədə əsası olan söhbətdir?

-Bilirsiz, ilk növbədə Gürcüstan bizim strateji partnyorumuzdur. Gürcüstan özünü bizsiz, biz isə Gürcüstansız özümüzü təsəvvür etmirik. Azərbaycanın inkişafı üçün böyük layihələr həyata keçirəndə cənab prezident hər zaman Gürcüstanın da inkişafına böyük fikir verib, çünkü Gürcüstan bizim qonşumuzdur, Avropaya açılan qapımızdır. Gürcüstanda olan problemlərin aradan qaldırılması üçün ələlxüsus da qazla bağlı sosial proqramlar həyata keçiririk. Bu gün Gürcüstanda əhaliyə verilən qaz Ermənistandan iki dəfə ucuzdur, bu da strateji partnyorluqdan irəli gəlir. Əsas Gürcüstanı qazla təmin edən bizik. Bunu müqavilələrə əsasən sosial bir paket əsasında keçiririk. Onu da deyim ki, bu gün Rusiyanın Ermənistana qaz nəqli üçün Gürcüstana ödədiyi tranzit haqqı bizə çatır. O vəsaiti biz alırıq və hovuz şəklində sosial bir layihə həyata keçiririk. Həm “Şahdəniz” tranzitinə görə, həm də Rusiya tranzitinə görə bütün qaz üzrə komissiyalar müqavilə əsasında SOCAR-a ödənilir.

O ki qaldı ikinci məsələyə, bu, Gürcüstanda kommersiya məsələləri ilə bağlıdır. Bilirsiniz ki, hazırda bu ölkədə yanacaqdoldurma məntəqələrinin 50 faizi sıxılmış qazdan istifadə edir. Bizim də artıq bu ölkədə 100-ə yaxın yanacaqdoldurma və 20-dən çox qazdoldurma stansiyalarımız var. Biz bunu inkişaf etdirmək niyyətindəyik. Bu, biznesdir, sosial layihə deyil, məhz buna görə də bu qazı istədiyimiz qiymətə sata bilirik. Bizim Gürcüstan hakimiyyəti qarşısında öhdəliyimiz yoxdur və onlar da öz seçimində azaddır: haradan istəsələr, qaz ala bilərlər. Rusiya qazı almaq istəyirlər - problem yoxdur. Boru keçir oradan, istədikləri vaxt pulunu ödəyib qaz ala bilərlər. Heç kəs bunun qarşısını ala bilməz. Amma rəqabət qabiliyyətlidirmi? Bu, ayrı bir sualdır. Buyursunlar alsınlar, kommersiya biznesinə girişirsə, buyursun. Rusiyaya, İrana, onların Ermənistana qaz verməsi məsələsinə gəldikdə isə bu, nağıla bənzəyir. Ermənistana 300 millimetrlik kəmər birləşdiriblər ki, bu da sosial bir layihədir. O xətt heç bir ilə 300 milyon kubmetr qaz buraxmır.

-Ümumiyyətlə, hər hansı bir narahatlıq varmı ki, Gürcüstan gələcəkdə bizim bu layihələrimizə hər hansısa bir şəkildə əngəl ola bilər?

-Mən sizə bir kəlmə ilə cavab verəcəm: Azərbaycanın dörd qonşusuna olan xətləri, diversifikasiya olunan imkanları, qaz anbarı imkan verir ki, Azərbaycansız bu regionda heç bir sərfəli neft-qaz əməliyyatı həyata keçirilməsin. Prezidentin apardığı neft strategiyası ondan ibarətdir ki, biz hamıya açığıq, diversifikasiya olunan marşrutlardan istifadə edirik və heç kimə də monopoliya sırımırıq.

-Eyni zamanda cənab prezident çox diplomatik ustalıqla əla bir fikir yeritdi orada ki, Azərbaycan ən böyük vergiödəyicisidir, həm də Gürcüstanın büdcəsini doldurur. Yəni belə bir partnyoru itirmək Gürcüstana sərf eləmir.

-Cənab prezident düzgün buyurdu ki, biz artıq 6-7 ildir Gürcüstanın ən böyük vergiödəyicisiyik, böyük şirkətlərdən biriyik. 500-600 nəfər adam işləyir bizdə. Artıq uzun müddətdir ki, dövlət böyük müqavilələr bağlayır bu ölkə ilə və bu müqavilələri reviziya etməyə heç kimin hüququ yoxdur.

Bundan əlavə, cənab prezidentin sərəncamı ilə bütün dini məbədlər qazla pulsuz təmin olunur. Bütün dini məbədlər bizdə qazla təmin olunur. Eyni zamanda, dövlət başçısı Gürcüstanda yaşayan azərbaycanlıları da düşünərək bu ölkədəki dini məbədlərin də qazla pulsuz təmin olunmasına göstəriş verdi. Cənab prezident istəyir ki, Azərbaycanda olan tolerantlıq Gürcüstanda da olsun. Əgər dini tolerantlıq olsa, bizim soydaşlarımıza orda yaşamaq daha rahat olacaq. Ona görə də biz Gürcüstanda olan 440-a yaxın kilsə, məbəd, məscidlərə pulsuz qaz verməyə başladıq. Həmçinin erməni kilsələrini qazla təmin edirik. Allah yolunda. Bizim erməni kilsəsi ilə heç bir düşmənçiliyimiz yoxdur. Bizim problem erməni xalqının hökumətində olan bəzi insanlarladır. İndi baxırsınız ki, orada nə gədər narazılıqlar var. Xalqın günahı yoxdur ki... Azərbaycanın tolerant xalq olduğunu cənab prezident bir daha sübut etdi.