İlk buraxılışına xalq artisti Zeynəb Xanlarovanı dəvət etməklə teleməkanda yaxşı mənada səs-küyə səbəb olan "Telemizan” verilişinin növbəti buraxılışı çəkilib

Zeynəb xanımın iştirak etdiyi "Telemizan”ın ilk buraxılışının reytinqi Azərbaycan televiziya məkanında ən yüksək reytinqdir. Verilişin ideya müəllifi və aparıcısı Vidadi Hüseynov bu barədə Mövqe.az-a məlumat verib. Onun sözlərinə görə, əslində verilişin formatı portret deyil və  bundan sonrakı buraxılışlarda teletamaşaçılar bunun şahidi olacaqlar:

”Əslində Zeynəb xanımın dəvət edildiyi verilişdə "fateh sənətkar” mövzusu müzakirə olunurdu. Çox şadam ki, ilk buraxılışdan veriliş adından söz etdirdi!”

Öyrəndik ki,  "Telemizan”da teatr sənətinə, opera və baletə,  ədəbiyyata aid mövzular müzakirə ediləcək. Bu verilişdə incəsənət və mədəniyyət ictimaiyyətinin ən dəyərli nümayəndələrinin iştirakı nəzərdə tutulub. "Telemizan”ın ayda iki dəfə efirə getməsi planlaşdırılıb. 

V.Hüseynov deyir ki, İctimai televiziyada ictimai  siyasi verilişlərlə yanaşı teatr və ədəbi mühitin işıqlandırılması da qarşıya qoyulan tələblərdəndir: ”İTV-nin baş direktoru Cəmil Quliyevin istəyi və tələbu budur ki, sosial, ictimai problemlərlə yanaşı  Azərbaycan mədəniyyəti, teatrı, incəsənəti, vokal sənəti də ictimai televiziyada müzakirə edilsin. Mədəniyyətin, teatrın yalnız bir üzü deyil, hər bir janrın qazancları, itkiləri bu verilişdə ekrana gəlsin”.

Bu dəfəki verilişin mövzusu Azərbaycanın  vokal sənətinin beynəlxalq müsabiqələrdə təmsilçiliyidir. Verilişin qonaqları isə Fidan və Xuraman Qasımovalar və  "525-ci qəzet”in redaktoru, tənqidçi Yaşar Əliyev maraqlı müzakirələr aparırlar. "Telemizan”ın müəllifi V.Hüseynov deyir ki, Azərbaycanın vokal sənətinin 100, Avropanın isə 500-700 yaşı var. Buna baxmayaraq, bizim opera sənətçilərimiz vokal sənətinin beşiyində-  İtaliyada, Afinada Qran-Pri qazanıblar.

"Telemizan”ın üçüncü mözvu isə Azərbaycanın mədəniyyətinin dünyada təbliğidir.  Qonaqlar isə muğam ifaçısı Alim Qasımov, rəqqasə Təranə  Muradova, pianoçu Yeğanə Axundova olacaqlar.
Qeyd edək ki, verilişin quruluşçu rejissoru Aydın Əsədulla, quruluşçu operatoru İlkin Şirinli, montaj rejissoru Elnur Ehtiramoğlu, prodüsseri Elçin Məmmədovdur.