Paytaxtın Suraxanı rayonu ərazisində yerləşən, "Azərbaycan Dəmir Yolları" QSC-nin Suraxanı Dəmir Yolu Stansiyasında vəziyyət heç də ürəkaçan deyil.  

Belə ki, Mediatv.az-a verilən məlumata görə, stansiyanın ərazisi böyük olmasa da, hissə-hissə bölünərək qanunsuz olaraq satılıb. Stansiyanın ərazisində sənədsiz olaraq dükan, maşın yuma və 4 ədəd təmir sexi fəaliyyət göstərir. Mediatv.az verilən məlumata görə, yaxınlıqda yaşayan sakinlər maşın yuma sexində daima sudan istifadə olunduğu üçün içməli sudan əziyyət çəkİrlər. Maşın təmiri üçün gələnlər tərəfindən, yaxınlıqda yaşayanların sakitçiliyi tez-tez pozulur. Bütün bu məsələlərə aydınlıq gətirmək üçün 08.04.2016-cı il tarixlə 10/139 nömrəli məktubla "Azərbaycan Dəmir Yolları" QSC-nə sorğu ilə müraciət etdik. 02.05.2016-cı il tarixdə DƏ-10/1 nömrəli məktubla "Azərbaycan Dəmir Yolları" QSC-i sorğumuza cavab verdi. Verilən cavabda Suraxanı dəmir yolu stansiyasının ərazisində yerləşən obyektlər üzrə “Azərbaycan Dəmir Yolları” QSC ilə icarədarlar arasında icarə müqavilələri imzalandığı bildirilir.

İlk baxışdan hər şeyin qanun çərçivəsində baş verdiyi görünür. Amma ortaya çoxlu suallar çıxır. Avtonəqliyyat vasitələrinin yuyulması və təmiri sexləri, dəmir yolu stansiyasının profilinə uyğun gəlmədiyindən strateji əhəmiyyətli stansiya ərazisində hansı əsasla fəaliyyət göstərir? Maşın təmir sexləri “Azərbaycan Dəmir Yolları” QSC-in balansına necə yerləşdirilib və onun balansında necə qeyd olunub? Stansiyanın ərazisində qeyri-qanuni belə sexlərin tikintisinə kim icazə verib?Balansda olmayan bir obyektlə hansı icarə müqaviləsi bağlana bilər?

Yəqin yaxın günlərdə bütün bu məsələlərə aydınlıq gətirməyə çalışacağıq

 Mövzu ilə bağlı qarşı tərəfin də mövqeyini işıqlandırmağa hazırıq.