Xatırladaq ki, İsmayıllıda xalq etirazı o zamankı əmək və əhalinin sosial müdafiəsi naziri Füzuli Ələkbərovun oğlu Vüqar Ələkbərovun ismayıllılıları təhqir etməsindən sonra baş vermişdi. V.Ələkbərov eyni zamanda hadisə baş verən dövrdə şəhərin icra hakimi olan Nizami Ələkbərovun qardaşı oğlu idi. Nazir oğlu “Hammer” markalı maşınla “Kəpənək” istirahət mərkəzinə qalxarkən qəza törətmiş, üzr istəmək əvəzinə maşından enərək, hadisə yerinə toplaşan insanları söymüş, sonra isə ümumi ismayıllılıların ünvanına təhqiramiz ifadələr işlətmişdi. Bundan qəzəblənən sakinlər nazir oğlunu döymüş, avtomobilini yandırmışdılar. Xəbər ildırım sürəti ilə İsmayıllıya yayılmış, xalq hərəkətə gəlmişdi. Kütləvi aksiyada 5000-ə yaxın insan iştirak etmişdi. Yüzlərlə İsmayıllı sakini həbs edilmişdi. Etirazçılar Ələkbərovlar klanına məxsus “Çıraq” hotelinə və bahalı maşınlara od vurmuşdular. Təsadüfi deyil ki, hadisələrin miqyası o qədər böyümüşdü ki, hadisədən dərhal sonra icra hakimi Nizami Ələkbərov vəzifəsindən azad edildi. 10 ay sonra isə Füzuli Ələkbərov nazir postundan uzaqlaşdırıldı. 

Baş verən hadisələrdə həbs edilənlərə divan tutuldu. Polis idarələrində kütləvi işgəncə faktları aşkar olundu. Saxlananların əksəriyyəti külli miqdarda pulun müqabilində azad edilsə də, 18 nəfər barəsində cinayət işi açıldı. 

Hadisə baş verən vaxt İsmayıllıya gedənlər arasında Müsavat başqanının müavini Tofiq Yaqublu və REAL hərəkatının sədri İlqar Məmmədov da olmuşdu. Aksiyadan sonra hər iki şəxs həbs olundu. Hazırda onlar məhbəs həyatı yaşayırlar.

PİA.AZ bildirir ki, İsmayıllı hadisələrinin səbəbkarı Vüqar Ələkbərov bu ayın əvvəlində virtualaz.org saytına müsahibəsində iki ildən sonra sükutu pozaraq, hadisələrin törədilməsinin səbəbləri barədə bunları deyib: “Həmin il prezident seçkiləri ili idi. Çoxsaylı xarici qüvvələr ölkəmizdə vəziyyətin gərginləşməsində, sabitliyin pozulmasında maraqlı idi. Guya təkcə İsmayıllı hadisələri idi? Bəs Qubadakı iğtişaşlar? Bəs ”Binə"dəki hadisələr? Bəs bir əsgərin ölümündən ötrü Bakının mərkəzində “facebook inqilabı” cəhdi? Əminəm ki, İsmayıllı hadisələrinin arxasında xarici qüvvələr və müxalifət dayanırdı. Sonrakı həbslər də mənim bu dediklərimi təsdiqlədi".

Qeyd edək ki, 2012-ci ilin martında Qubada İsmayıllı hadisələrinə oxşar olay baş vermişdi. İcra hakimi Rauf Həbibovun qubalıları təhqir etməsindən sonra xalq ayağa qalxmış, icra başçısının mülkləri və icra hakimiyyətinin binası yandırılmışdı. Rauf Həbibov isə rayondan qaçmışdı. 

Göründüyü kimi, baş verən hər iki etiraz aksiyasında etirazçılar meydanda tək qaldılar. Onlara nə digər rayonların sakinləri, nə də ölkənin demokratik düşərgəsi tam dəstək vermədi. 

Politoloq Natiq Miri İsmayıllı və Quba hadisələrinin lokal hadisələr olduğunu qeyd  etdi: “Bu hadisələr böyüyə bilmədi. Yəni bütün Azərbaycanı əhatə etmədi. Bu, xalqın hakimiyyətdən razı olmasına görə deyildi. Hazırda ölkədə sosial-siyasi mühit bərbad vəziyyətdədir. Elə bərbad hadisələr baş verir ki, biz bunu 20-30 il əvvəl təsəvvür edə bilmirdik. Bu isə öz təsirini göstərməyə bilməz. İnsanların böyük əksəriyyəti yaşamaq uğrunda mücadilə verir. İnsanların 80 faizi banklarda girov vəziyyətindədir. Siyasi yöndə düşünə bilmirlər.