Rusiyayönlü separatçıların nəzarətində olan Ukraynanın Luqansk şəhərində döyüş gedir. ANS PRESS-in məlumatına görə, atışmalar nəticəsində ən az 15 nəfər həlak olub. 

Ukrayna Milli Еəhlükəsizlik Şurasının spikeri Andrey Lısenko 15 nəfərin cəsədinin küçələrdən götürüldüyünü və döyüşlərin davam etdiyini açıqlayıb. 

"Hadisə yerində olan hərbçilərimiz həlak olanlar arasında çox sayda uşaqların və qadınların olduğunu bildirirlər. Onların cəsədləri tanınmaz hala düşənədək yandırılıb. Cəsədlərin çoxu partlayışların nəticəsində parçalanıb." - deyə o, əlavə edib.

"Luqansk xalq respublikası"nın lideri qaçqınlardan ibarət karvanın atəşə tutmadıqlarını açıqlayıb. 

Ukrayna daxili işlər nazirinin müşaviri Zoran Şkiryak Luqansk şəhərində xüsusi əməliyyatın davam etdiyini açıqlayıb: "İtkilərimiz olsa da döyüşlər davam edir. Ukrayna Silahlı Qüvvələrinin xüsusi təyinatlı bölməsinin, Milli Qvardiyanın və DİN-in manevr qrupları ilə separatçılar arasında küçə döyüşləri gedir. Separatçı qüvvələrin tərkibində Rusiya xüsusi təyinatlıları var"