Akademik Ramiz Mehdiyevin Dövlət İdarəçilik Akademiyasının 15 illik yubileyindəki çıxışının doğurduğu rezonans, həmişə olduğu kimi, bu dəfə də genişmiqyaslı oldu. Onun televizilalar haqqında söylədiyi ağır tənqidi fikirlər əslində hər kəsi düşündürməlidir. Çünki  bir millətin sifəti onun televiziyasıdır. Amma bugünkü televiziya bizim millətin  sifətidir deyə bilərikmi? 

Ramiz Mehdiyevin məlum çıxışından sonra isə dövlətin rəsmi qəzeti olan “Azərbaycan” qəzeti təhsil sistemini və özəl televizayları kəskin şəkildə tənqid etdi. Dünən isə məsələni müzakirə edən MRTŞ televiziya aparıcılarının yaradıcılıq qabiliyyətinin tükəndiyini bildirdi.

Nəzərə alsaq ki, televiziya həm də cəmiyyətin güzgüsüdür. Ona görə də hesab etmək olar ki, televiziyalarda  sərbəst yaradıcılıq mühitnin olmaması da bu problemlərin yaranmasının səbəblərindən biridir. 

PİA.AZ-ın əməkdaşı bu barədə tanınmışış televiziya mütəxəssisi Qulu Məhərrəmli ilə söhbət edib. Qulu Məhərrəmlinin fikrincə televiziyalar gənclərin "üçüncü valideyninə" çevrilib.Amma bu valideyn həddindən artıq qorxuncdur:

“Günümüzün acı reallığı ölkənin efir məkanının yeniyetmə və gənclər üçün "üçüncü valideynə" - amma daha təsirli və qorxunc valideynə çevrilməsini şərtləndirib. Bu gün gənclərimizin bir qismi məhz teleekranın zombiləşdirdiyi qrupa, onların göstərdikləri, yaydıqları total səviyyəsizliyin, mənəvi aşınmanın qurbanına çevrilib. İstisnasız olaraq bütün kanallar vasitəsilə milli-mənəvi dəyərlərə qarşı yürüdülən "səlib yürüşü", ailə institutunun mənəvi dayaqlarının dağılmasını təbliğ edən verilişlərin artması, həmçinin mahnısından çox qalmaqalları ilə məşhur olan müğənnilərin, sponsor sayəsində "sənətkara" çevrilənlərin, şou-biznesi əxlaqsızlıq və bayağılıq kimi qəbul edənlərin, televiziya vasitəsilə gənclər üçün örnək, nümunə kimi sırınması nəticə etibarilə mənəvi bəlalarımızın artmasına xidmət etməliydi və edir də!”. Bu Ramiz Mehdiyevin 5 il öncəki  "Azərbaycanın efir məkanı: problemlər və vəzifələr"  adlı araşdırma-yazısında səsləndirdiyi fikirlərdir. Problemlər aydınlıqla təsvir olunur. Bəs səbəb nədir?   Kim  məsuliyyət daşıyır?

Mən  hesab edirəm ki, qaldırılan məsələ çox aktualdır. Televiziyaların düşdüyü vəziyyət  artıq o dərəcədə dözülməzdir ki, ölkənin yüksək  ranqlı rəsmi şəxsi bu  barədə  danışır və üstəlik bir nömrəli rəsmi qəzeti bu haqqda ciddi tənqidlə çıxış edir. Əvvəllər də  “Azərbaycan” qəzetində bu tipli tənqidi yazılar dərc olunub. Amma burda  bu dəfə ünvanlar dəqiq göstərilir. Bütün  bunlar  mənəvi  böhranımızın göstəricisidir.  Televiziyalarda mənəviyyatsız səviyyəsiz insanlar sənətkar adıyla xalqa sırınır. Belə məqalələr cox yazılır amma nə olsun ki? 

Mənim də  bu mövzuda bir neçə  məqaləm var.  Məsələ ondadır ki, nəticə yoxdur. Yazılanları nəzərə alıb nöqsanları aradan qaldırmaq lazımdır. Buna cavabdeh olan şəxslərin məsuliyyətə cəlb etmək lazımdır, məsələ budur.  Hesab edirəm ki bu problemlərlə bağlı ciddi tədbirlər görülməlidir. Yazıyla iş bitmir. Media sahəsində böyük məsuliyyətsizliklər  var.  Hər  şeyi də özəl televiziyaların boynuna yıxmaq olmaz.

Dövlət  büdcəsindən  maliyyələşən 4 televiziya var, nəyə görə  onlar baxılası, populyar verilişlər hazırlamırlar? Maraqlı,  düşündürən  verilişlər demək olar yoxdur.  Vaxtilə ANS  kanalında  maraqlı debatlar,  talk-şoular olurdu indi niyə yoxdur? Niyə  hazırlanmır bu verilişlər? Niyə  ictimai actual problemlər müzakirə olunmur? 

Əslində  televiziyalrın proqram siyasətində  ciddi dəyişikliklər aparılmalıdır.  Kim şərait  yaradıb ki, şou proqramlar əsas yer tutur, və mənəviyyatsız  insanlar  televiziya kanallarında  meydan  sulayır?  Suallar çoxdur....və bu sualları da cavabı var. Və onları cavablandırmaq lazımdır. 

Mənə elə gəlir ki bu sualları eşidən hər kəsin ağlına məsuliyyət daşıya bilən   şəxslərin adı gəlir. Bilirsiniz,  məsələ ondadır ki, rəsmi dövlət qəzeti ünvansız danışa bilməz, konkret adlar çəkilməlidir. Ya bu məsələni qaldırmayın ya da bütün təfərrüatıyla, ünvanıyla danış. Bilinsinsin  ki kim məsuliyyət daşıyır və problem necə həll etmək olar”.