Cəmiyyət (2-03-2017, 16:12)
Xarici ölkələrdə təhsil proqramına 188 milyon manat xərcləndi və yarımçıq saxlanıldı - SİYAHI
“2007-2015-ci illərdə Azərbaycan gənclərinin xarici ölkələrdə təhsili üzrə Dövlət proqramı” çərçivəsində 3302 nəfər xaricdə təhsil alıb.
Mediatv.az bunu Dövlət Neft Fonduna istinadən bildirir.
Dövlət proqramının maliyyələşdirilməsi məqsədilə 2008-2016-cı illər ərzində Fonu tərəfindən ümumilikdə 188,4 milyon manat o cümlədən 2016-cı il üzrə 31 606,7 min manat məbləğində vəsait sərf olunub. Bu vəsait Dövlət proqramı çərçivəsində xarici ölkələrdə təhsil alanların yaşayış (15 471,9 min manat), təhsil haqqı (13 977,7 min manat), yol (860,6 min manat), sığorta (491,.0 min manat), digər (771,7 min manat), viza və qeydiyyat (33,8 min manat) xərclərinin ödənilməsinə yönəldilib.
Fondun məlumatına görə, Dövlət Proqramında iştirak edən gənclərin əksər hissəsi Böyük Britaniya (29,1%), Türkiyə (22,1%), Almaniya (12,4%), Kanadanın (7,2%), Niderland (5,2%) və Rusiya (3,8%) universitetlərində təhsil alırlar.
Böyük Britaniyada 960 nəfər
Türkiyədə 731 nəfər
Almaniyada 409 nəfər
Kanadada 239 nəfər
Hollandiyada 173 nəfər
Rusiya 125 nəfər
İsveçrədə 104 nəfər
Fransada 101 nəfər
ABŞ-da 97 nəfər
İtaliyada 39 nəfər
Cənubi Koreyada 35 nəfər
İsveçdə 31 nəfər
İspaniyada 26 nəfər
Çexiyada 21 nəfər
Litvada 18 nəfər
Macarıstanda 13 nəfər
İrlandiyada 11 nəfər
Polşada 10 nəfər
Sinqapurda 10 nəfər və sair.
Hal-hazırda xarici ölkələrin universitetlərində Magistratura pilləsində təhsil alan tələbələrin əksər hissəsi iqtisadiyyat və idarəetmə (722 nəfər), sənaye (138 nəfər), hüquq ( 120 nəfər) informasiya və kommunikasiya texnologiyaları (118 nəfər) sahələrində təhsil alırlar. Bakalavr pilləsində təhsil alanların əksəriyyəti magistratura pilləsində olduğu kimi əsasən iqtisadiyyat və idarəetmə (320 nəfər) sahəsində təhsil alır.
31 dekabr 2016-cı il tarixinə Dövlət proqramı çərçivəsində xaricdə təhsili maliyyələşdirilmiş və məzun statusunu almış tələbələrin sayı 1404 nəfər təşkil edir. Bu tələbələrin 33 nəfəri 2-ci dərəcəli məzunlardı. Məzunların əksər hissəsi – 572 nəfəri Böyük Britaniya, 139 nəfəri Türkiyə, 132 nəfəri Almaniya, 83 nəfəri Rusiya, 71 nəfəri Fransada – təhsillərini uğurla bitirib.
Xatırladaq ki, sözügedən Dövlət Proqramına start verilərkən, layihənin 5 min tələbəni əhatə edəcəyi göstərilirdi. Lakin ötən ilin əvvəlindən başlayaraq, xarici universitetlərə tələbə qəbulu dayandırılıb. Amma burada nəzərdə tutulduğu kimi 5000 deyil, cəmi 3302 nəfər əhatə olundu. Dövlət proqramının müddətinin uzadılmasına isə hökumət lüzum görmür.