BŞİH növbəti dəfə təxribat törədərək mitinqin təyin olunan tarixdə keçirilməsinə razılıq verməyib. BŞİH-in cavab məktubunda mitinqin mayın 16-da keçirilməsinə razılıq verildiyi qeyd edilib. 

BŞİH-in cavabı Milli Şurada etirazla qarşılanıb. Milli Şuranın mitinq komitəsinin rəhbəri, AXCP sədrinin müavini Fuad Qəhrəmanlı bildirib ki, əslində BŞİH 17 may mitinqi üçün müraciətə mənfi cavab verib: “Bakı Şəhər İcra Hakimiyyətinin mitinqin vaxtını dəyişməyə hüququ yoxdur. Bakı Şəhər İcra Hakimiyyətinin, sadəcə olaraq, mitinqə razılıq verib-verməmək haqqı var.

Qurum bizim təyin etdiyimiz vaxta razılıq verməyib. Əksinə, ”Sərbəst toplaşmaq azadlığı haqqında" Qanuna zidd olaraq mitinqin mayın 16-da keçiriləcəyi təqdirdə icazə verəcəkləri ilə bağlı məlumat yayıblar. Bakı Şəhər İcra Hakimiyyəti bu cür dolayı yolla icazə verməkdən imtina edib. Faktiki olaraq mayın 17-də mitinq keçirməklə bağlı müraciətimizə razılıq verilməyib. Biz mayın 17-də mitinq keçirmək üçün hazırlaşmışdıq. Çox güman ki, mayın 16-da mitinq keçirilməyəcək".

Xatırladaq ki, Milli Şura mayın 3-də də eyni ünvanda mitinq keçirmək üçün BŞİH-ə öncədən məktub ünvanlamışdı. İndi yaranmış vəziyyət o zaman da ortaya çıxmışdı. Belə ki, BŞİH  mayın 3-də yox, 2-də mitinq keçirilməsinə razılıq verildiyini cavab məktubunda qeyd eləmişdi. Milli Şura isə bu cavabı qanunsuz sayaraq qəbul etməkdən imtina eləmişdi. (musavat.com)