Bir neçə gün öncə “Neolit” şadlıq sarayında karantin rejimini pozaraq toy məclisi keçirilməsi ilə bağlı restoranın inzibatçısı 10 sutka həbs edilib.

Mediatv.az  xəbər verir ki, Nizami RPİ-25-ci Polis Şöbəsinin tərtib etdiyi protokola aprelin 3-də rayon məhkəməsinin hakimi Mətanət Hacıyevanın sədrliyi ilə baxılıb. İnzibatçı Qarayev Fuad Hafiz oğlu “Neolit” şadlıq sarayında toy mərasiminin keçirilməsinə şərait yaradaraq xüsusi karantin rejiminin qaydalarını pozmaqda təqsirləndirilib.

Məlumatlara görə,  "Neolit" restoranının sahiblərindən biri Nizami rayon İcra Hakimiyyətinin sabiq başçısı Arif Qasımovdur. Arif Qasımovun qaynı İsrafil isə həmin restorana rəhbərlik edən şəxsdir.

Qeyd edək ki, bir müddət "Neolit” iki şəxsə məxsus olub. Və şəriklər arasında hər zaman narazılıqların olması barədə mətbuatda tez-tez məlumatlar yayılıb.

Hətta bir neçə il il əvvəl şəriklər arasında silahlı münaqişə olduğu barədə informasiyalar dərc olunmuşdu. Bir qədər sonra isə şəriklərdən birinin restoranı yandırması haqda xəbər tirajlandı.

Görünür, bu münaqişələr sonucda şəriklərin birinin saraydan əl çəkməsi ilə nəticələnib. Və həmin adam öz payını Arif Qasımova satıb.

Mənbə unikal.org