Ombudsman Aparatı hərbçilərin əmək pensiyalarının artırılması məqsədi ilə Konstitusiya Məhkəməsinə sorğu göndərib.

Bu barədə “Qafqazinfo”ya Ombudsman Aparatının Elmi-analitik sektorunun müdiri Mahir Məmmədov bildirib. Onun sözlərinə görə, “Əmək pensiyaları haqqında” Qanunun 9.6-cı maddəsinin Konstitusiyaya uyğunluğunun yoxlanılması ilə bağlı Ombudsman tərəfindən Konstitusiya Məhkəməsinə sorğu ünvanlanıb.

Belə ki, “Əmək pensiyaları haqqında" Qanunun 9.6-cı maddəsinə əsasən, hərbi qulluqçular güzəştli əsaslarla pensiyaya çıxdıqda onlara təyin olunan pensiyanın hərbi qulluğa qayıdacağı təqdirdə əlavələrin hesablanması nəzərdə tutulub. Amma hərbi qulluqçular pensiyaya çıxıb mülki sahədə çalışarsa, onların pensiyasına əlavələrin hesablanması nəzərdə tutulmayıb. Bu da Konstitusiyamızda təsbit edilmiş hüquq bərabərliyi, mülkiyyət hüququ ilə bağlı normalarla uyğunsuzluq yaradır. Yəni eyni qəbildən olan insalara fərqli yanaşma göstərilir.

Ombudsman da mandatına uyğun olaraq "Əmək pensiyaları haqqında" Qanunun 9.6-cı maddəsinin Konstitusiyaya uyğunluğunun yoxlanılması məqsədilə Konstitusiya Məhkəməsinə sorğu ünvanlayıb. Bu da keçmiş hərbçilərə münasibətdə atılan doğru addım kimi dəyərləndirilməlidir".

Xatırladaq ki, hərbi qulluqçulara əmək pensiyası hərbi xidmət dövründə deyil, hərbi xidmətdən buraxıldıqdan sonra təyin olunur. Əmək pensiyası təyin olunduqdan sonra hərbi xidmətini davam etdirən əmək pensiyaçılarının pensiyası sonuncu təminat xərcliyinə görə yenidən hesablanmır. Bu kateqoriyadan olan şəxslərin əmək pensiyası yalnız fərdi hesablarında qeydə alınmış sığorta pensiya kapitalına görə yenidən hesablana bilər.

Qeyd edək ki, sorğu Konstitusiya Məhkəməsinin Plenumuna qəbul olunub.