Mediatv.az:  Qəzetimizin 01.11.2016-cı il tarixli sayında ““KİA Servis” verdiyi zəmanətdən imtina etdi” sərlövhəli tənqidi yazı dərc olunmuşdu. Məqalədə “KİA Motors Azərbaycan” MMC-nin fəaliyyətindən narazılıq edən növbəti vətəndaşın redaksiyamıza ünvanladığı şikayət məktubunda yer almış faktlar təqdim olunmuşdu. Ona görə növbəti deyirik ki, bu artıq bizə ünvanlanan birinci şikayət deyil. Belə məlum olur ki, “KİA Motors Azərbaycan” MMC-nin müştərilərinin sayı artdıqca və deməli, ölkənin avomobil bazarında mövqeyləri möhkəmləndikcə, artan gəlirlərin fonunda MMC rəhbərliyinin və əməkdaşlarının məsuliyyətləri deyil, vətəndaşlara qarşı etinasızlıqları böyüyür. Bu isə, istənilən biznes üçün təhlükəli bir tendensiyadır. Amma qoy məsələnin bu tərəfi “KİA Motors Azərbaycan” MMC-ni və bu müəssisənin Cənubi Koreyalı tərəfdaşlarını düşündürsün. Bizi maraqlandıran məqam isə, öz vətəndaşlarımızın bu xüsusda yaşamalı olduqları problemlərlə bağlıdır. Beləliklə, redaksiyamıza müraciət edən Qazax sakini, vətəndaş Şamil Əliyev öz ərizəsində başına gələnləri belə təsvir etmişdi: “2012-ci ilin axırlarında Gəncədə yerləşən avtosalondan “KİA Cadenza” markalı avtomobil aldım. Maşının 5 illik zəmanəti var. Bütün bu müddət ərzində də avtomobilə yalnız Gəncə şəhərində fəaliyyət göstərən “KİA Servis” mərkəzində qulluq olunub. Üç gün bundan əvvəl isə, maşın məni gözləmədiyim halda yolda qoydu. Hadisə Ağstafayaya gedərkən baş verdi. Trasla hərəkət edərkən, heç bir səbəb olmadan avtomobilin sürət qutusu sıradan çıxdı. Təbii ki, Gəncəyə, servis mərkəzinə zəng vurdum. Əlaqə saxladığım şəxs servisin Əbdülxaliq adlı əməkdaşı idi. Məsələni ona danışanda, həmin şəxs mənə dedi ki, avtomobillərin sürət qutularının təmirilə yalnız Bakıdakı servis mərkəzində məşğul olurlar. Bunu bəhanə edib, hətta mərkəzin hesabına evakuator göndərməkdən də imtina etdilər. Məcbur qalıb öz hesabıma evakuator çağırdım və nasaz avtomobili Gəncəyə apardım. Buna 100 manat xərcim çıxdı. Hələ bir geri qayıtmağım, Ağstafaya taksi ilə getməyim və bəzi xırda-para xərclər də mənə əlavə 50 manata başa gəldi. Gəncədə avtomobili diaqnostika edib təsdiq etdilər ki, həqiqətən də problem sürət qutusundadır. Həm də qeyd etdilər ki, bu, “Cadenza” modellərində çox yayılmış zavod deffektidir. Bundan sonra isə, avtomobili Bakıya daşımaq üçün məndən daha 200 manat pul istədilər. Əvvəlcə servisin rəhbəri İbrahim müəllimə müraciət etdim. Nəticə olmadı. Bundan sonra Bakıda yerləşən “KİA Servis” mərkəzinə zəng vurdum. Mənimlə danışan şəxs mərkəzin baş meneceri Elnur Seyidəliyev oldu. İlk əvvəl bu şəxs də avtomobilin Bakıya mənim hesabıma daşınmalı olduğunu iddia edirdi. Lakin sonradan, Gəncə servis mərkəzinin rəhbəri İbrahim müəllim mənə dedi ki, Elnur ona zəng vurub və deyib ki, daşınma haqqının 160 manatını şirkət, 40 manatını isə mən ödəməliyəm. Bu təklifi də belə izah edirlər ki, guya Cənubi Koreyalı tərəfdaşları “KİA Motors Azərbaycan”ın servis mərkəzlərinə xarab olmuş avtomobillərin daşınması üçün məhz bu məbləğdə, yəni cəmi 160 manatlıq limit ayırıblar. Onda belə çıxır ki, “KİA” avtomobilləri ilk beş il ərzində yalnız serviz mərkəzlərinin yaxın ətrafında sürülmək üçün nəzərdə tutulub? Lakin mən bütün bunları Elnur Seyidəliyevə başa sala bilmədim. Son sözü də bu oldu ki, hara istəyirsən şikayət edə bilərsən. Əlbəttə, mən burada 40 manatın davasını etmirəm. Amma məsələ bundadır ki, əgər “KİA Motors Azərbaycan” dünya şöhrətli avtomobil markasını ölkəmizdə təmsil etməyə qalxıbsa, onda buyursunlar beynəlxalq standartlara uyğun da iş qursunlar. Bu arada isə, mənim avtomobilim hələ də Gəncə “KİA Servis” mərkəzinin bokslarından birində durmaqdadır...”

Dünən isə, Şamil Əliyev təkrar redaksiyamıza müraciət edərək, bəzi dəqiqləşdirmələr və yeni məlumatlar təqdim etmişdir. Belə ki, vətəndaşın aldığı 5 illik pulsuz servis zəmanəti avtomobilin yalnız müəyyən (müqavilədə qeyd olunmuş) hissələrinə aid olduğundan, 2012-ci ildən bu günə qədər keçən müddət ərzində Şamil Əliyev Çəncə “KİA Servis” mərkəzində maşına göstərilən müxtəlif xidmətlərə görə təxminən 11000 (on bir min) manat məbləğində pul xərcləmişdir. Əlbəttə, həmin xidmətləri başqa servis mərkəzlərində bir neçə dəfə ucuz qiymətə almaq olardı. Lakin müştəri məhz zəmanətin saxlanmasına görə belə böyük məsrəflərə gedib. İndi isə məlum olub ki, sən demə bu zəmanətin də heç bir təminatı yox imiş. Başqa sözlə desək, vətəndaşdan son dörd il ərzində hər ay təxminən 230 manat gəlir əldə edən “KİA Servis” indi öz öhdəliklərini yerinə yetirməkdən boyun qaçırır. İkinci bir tərəfdən, yeni avtomobilə bu qədər xərc qoyulması zərurəti bir daha bu modelin keyfiyyəti barədə ciddi düşünməyə əsas verir. Təsəvvür edin ki, şəhərlərarası trasla, yüksək sürətlə hərəkət edən avtomobildə qəfil nasazlığın yaranması sürücü və sərnişinlər üçün həyati təhlükə də yarada bilərdi. Amma bütün bunlar nə “KİA Motors Azərbaycan” MMC-nin, nə də onun altqurumu olan Bakı və Gəncə “KİA Servis” mərkəzlərinin rəhbərliyini düşündürmür. Bunun əvəzində, Şamil Əliyevə telefon əlaqəsi saxlayan Gəncə “KİA Servis” mərkəzinin rəhbərliyi mətbuatda onların adının hallandırması ilə bağlı vətəndaşa öz iradlarını bildirib: “Bizlik burda nə var ki, qəzetdə bizdən də yazmısız? Sürət qutusuna Bakıda baxılır və deməli problem də onlarlıqdır. Onsuz da Bakı mərkəzində problemlər kifayət qədərdir. Elə məhz çoxsaylı maxinasiyaların da nəticəsində bir müddət əvvəl oranın rəhbərliyi dəyişdirilib...”

Göründüyü kimi, dara düşüncə həmkarlar bir-birilərini “güdaza” verməkdən də çəkinmirlər. Amma fakt faktlığında qalır. Yəni avtomobilin məhz hansı hissəsinin xarab olduğu bilavasitə Gəncə “KİA Servis” mərkəzində müəyyən olunub. Buraya isə, həmin avtomobilin daşınmasını da servis təmin etməli idilər. Amma baxdığımız halda məhz vətəndaş “KİA Motors”un deffektli avtomobil istehsal etdiyinə görə, həm həyati təhlükə yaşayıb, həm planlaşdırdığı günlük rejimi pozulub, həm də əlavə 150 manat maddi ziyan çəkib. Əslində isə, buraya həm də səfərinin baş tutmaması səbəbindən vətəndaşın əldə edə bilmədiyi gəlirlərini və keçirdiyi mənəvi stresə görə ona düşən kompensasiyanı da əlavə etmək lazımdır.

Yaxşı olardı ki, “KİA Motors Azərbaycan” MMC-nin rəhbəri Əşrəf Səfərov da, Bakı “KİA Servis” mərkəzinin baş meneceri Elnur Seyidəliyev də daha çox bu barədə düşünsünlər. Amma Elnur Seyidəliyev şikayətçi vətəndaşla olan növbəti telefon danışığı zamanı özünün necə “sığortalanmasından” bəhs edib. Şamil Əliyev xəbər verir ki, baş menecerlə son danışığı zamanı Elnur Seyidəliyev ona bu sözləri deyib: “Ora-bura yazmağın heç bir nəticəsi olmayacaq. Birincisi mən rəhbərliyin dediklərini etmişəm. Mənə deyiblər ki, avtomobilin daşınma xərcləri üçün limiti 160 manat təyin et, mən də etmişəm. İkincisi də mən müdirin yaxın qohumuyam. Odur ki, daşınma xərclərinin qalan hissəsini ödəməsəz, avtomobil elə Gəncədə də qalacaq...”

Amma bizim də ağlımıza yaxşı bir ideya gəlib. İstəyirik bütün bu olub bitənlərlə bağlı birbaşa Cənubi Koreyaya, yəni istehsalçılara müraciət edək. Görəsən onlarda bu kimi problemlər necə həll olunur? Bir də maraqlıdır, görəsən Azərbaycan kimi stabil və yüksək gəlirli istehlak bazarını itirmək təhlükəsini yaradan “tərəfdaşlara” onların münasibəti necə olacaq?

Qarşı tərəfin də münasibətini öyrənmək istərdik.