Mingəçevirin icra başçısı işdən çıxarılmayacağını qarantiləyib 

Mediatv.az Politika.Az-a istinadən xəbər verir ki, Mingəçevirin icra başçısı Niyazi Bayramov rəqiblərinə əzələ nümayiş etdirir. Politika.Az xəbər verir ki, bir müddət əvvəl haqqında mətbuatda yayılmış məlumatlara əsasən işdən çıxarılacağı gözlənilsə də, bunun tərsi baş verdi. 

Qeyd edək ki, Niyazi Bayramovla bağlı iki skandal məlumat yayılmışdı. Birinci məlumat onun xidməti maşınıyla 200 km/saat sürətlə hərəkət etdiyi, qaydaları pozduğundan ibarət idi. Burada bildirilirdi ki, Mingəçevirin icra başçısı qanunları pozduğu üçün cəzalandırılmalıdır. 

Digər xəbər isə birincidən daha qalmaqallıydı. Belə ki, Niyazi Bayramovun yenə xidməti maşınında bir-neçə qadınla birlikdə hərəkət etdiyi, habelə onların maşının içində rəqs etdikləri görüntüyə alınmışdı. Məlumatı yayan sayt vurğulayırdı ki, icra başçısının qadınlarla birlikdə getdiyi villanın da yerini müəyyənləşdiriblər və yaxın günlərdə yayımlayacaqlar. Lakin o gün, bu gün nə villa barədə məlumat yayılır, nə də qadınların kim olduğu açıqlanmır. 

Təbii ki, bütün bu proseslər nəticə etibarıyla Niyazi Bayramovun işdən çıxarıla biləcəyini təxmin etdirirdi. Lakin gözlənilənlərdən tam fərqli olaraq, onu nəinki işdən çıxardılar, əksinə təltif etdilər.Politika.Az xəbər verir ki, əksəriyyət televizor qarşısında əyləşib Niyazi Bayramovun işdən çıxarılacağı xəbərini gözlədiyi bir vaxtda, məlumat yayıldı ki, dövlət başçısı ona «3-cü Dərəcəli Vətənə Xidmət Ordeni» verib. Bu isə icra başçısının rəqiblərinin arzusunu ürəyində qoyması deməkdir.