Ramiz Novruzun səsi, özünüifadəsi, aktyorluq qabiliyyəti... – hamısını qoyun kənara.
O, xarakter idi, insan idi, səmimi idi, gülərüz idi...
Bir neçə dəfə həmsöhbət olmuşdum – peşəmlə bağlı yox, sadəcə, təsadüfən, ümumi dostlarla birgə. İntellekti, səviyyəsi, saxtalıqdan kənar olması diqqətimi çəkmişdi.
Bəzən aktyordan oynadığı obraza uyğun yaşam tərzi və xarakter gözləyirlər və təbii ki, görmürlər – çünki aktyor fərqli obrazlar yaradır, həyatda isə mahiyyətcə kimdirsə, o olur!
Ramiz Novruzda təsəvvürümüzdə olan general xarakteri vardı: ciddi, səmimi, savadlı, sözünün yerini bilən, dinləməyi və dinlətməyi bacaran.
Ramiz Novruz söz adamı idi həm də: gözlərindən, danışığından, özünü ifadə etməsindən görünürdü və az keçmədi ki, hamı bunu gördü: onun “Hələ sevirəm deməmişdilər” də daxil olmaqla, xeyli pyesi var.
Tərcümə də edirdi – sevdiyini, ürəyinə yatanı Azdramın səhnəsində görmək istəyirdi.
Vaxtında qiymətini alan sənətkarlardan sayıla bilər, 43 yaşında xalq artisti olmuşdu.
Heç bir intriqada adı keçməzdi; hansısa qalmaqalda olduğunu yada sala bilmirəm.
...Türkiyədə fevral ayının ikinci zəlzələsinin təsirində - 20 fevral gecəsi onun ölüm xəbərini aldıq. Sanki Türkiyədəki zəlzələnin təsirindən Azdramın sütunlarından biri uçdu...
Sarsıdıcı idi. Uşaqlığımızın, gəncliyimizin daha bir əzəmətli, sevilən simasını itirdik.
Daha bir istinad nöqtəmiz əbədiyyətə qovuşdu.
Ramiz Novruz 26 yaşında Azdramın truppasına daxil olmuşdu, ölüncə də o teatrda fəaliyyət göstərdi. Bu teatrın qüdrətini qorumaq üçün təkcə yüzlərlə möhtəşəm obraz yaratmadı, həm də onun səhnəsini yazdığı pyeslərlə, tərcümələrlə, hərdən qiraətlə zənginləşdirdi.
Bilmirəm, Ramiz Novruz dünən vida mərasimi keçirildiyi evini nə vaxt alıb, orda neçə il yaşayıb. Ancaq dəqiq bilirəm ki, Ramiz Novruz 68 ilə çatmayan ömrünün tam 40 ilini (xəstəliyi müddətini çıxmaqla) Azdramda yaşayıb, yaradıb, nəfəs alıb...\
40 il bu səhnənin pərdəsinin alqışlarla qalxmasına canını verən Ramiz Novruz üçün bu səhnə son dəfə pərdə qaldırmadı.
Vida mərasiminin harada və necə keçirilməsinin Haqqın dərgahına qovuşan Ramiz Novruza qəti aidiyyəti yoxdur: o artıq ayrı dünyadadır.
Doğrusu, heç Ramiz Novruzu sevənlər üçün də bunun heç bir fərqi yoxdur.
Onun məhz Azdram səhnəsindən götürülməsi Azdramın özünə, onun truppasına, rəhbərliyinə lazımdır: Özünə, sənətə, səhnəsinə və bu səhnəyə can verənlərə hörmətini göstərmək üçün.
Gərək Azdram özünə hörmət edəydi...шаблоны для dle 11.2