“Bu yalnız Azərbaycan üçün deyil, həm də Ermənistan üçün böyük şansdır. Çünki qapalıdırlar, yəni, dünyaya çıxışları olmayan bir coğrafiyada yerləşirlər”.

Mediatv.az xəbər verir ki, bu fikirləri Bizim.Media-ya müsahibəsi zamanı Türkiyənin Nişantaşı universitetitinin professoru Gülçin Güner səsləndirib.

- Gülçin xanım, Azərbaycan-Ermənistan münasibətlərini yaxından izləyirsiz. Bu gün sülh təklifi və Ermənistanın bundan qaçmasını necə dəyərləndirmək olar?

- Bu yalnız Azərbaycan üçün deyil, həm də Ermənistan üçün böyük şansdır. Çünki qapalıdırlar, yəni, dünyaya çıxışları olmayan bir coğrafiyada yerləşirlər. Sülh imkanı və fürsəti həm Azərbaycana, amma ki, daha çox Ermənistana, Ermənistan xalqına bir lütüfdür.

Sülh müqaviləsi həm də Cənubi Qafqazın istiqrar və hüzura qovuşması deməkdir. Bilirsiz ki, haqsız savaşda, yəni Azərbaycan torpaqları işğal altında idi, buna görə də, haqsız bir savaş deyirəm. 1993-cü ildən bu tərəfə BMT-nin qərarlarına rəğmən, 30 il davam edən ATƏT-in Minsk qrupu rəhbərliyində belə heç bir nəticə əldə edilmədi.

Son gəlinən nöqtədə, 44 günlük Vətən Müharibəsində Azərbaycan öz imkanları ilə özünə qarşı olan haqsız işğala son qoydu. Sizin də ifadə etdiyiniz kimi, bir sülh ortamı, sülh pəncərəsi açıldı. Təmənnim ondan ibarətdir ki, Ermənistan tərəfi bu sülhü dəyərləndirə bilsin. Bu olmayacağı təqdirdə, zərərlərini də özləri çəkəcəklər. Azərbaycanın ortaya qoyduğu təkliflər olduqca ağlabatan və qanunidir.

- Sülhə əngəl yaradan məqamlar və ya şəxslər kimlərdir?

- Ermənistanın sülhü qəbul etməsi bölgədə yeni fürsətlər yaradacaq. Xüsusən sülhün gətirdiyi iqtisadi yüksəliş. Çox-çox irəlidə bir inteqrasiya belə ola bilər. Mən bununla bağlı xəyallar yaşayıram. Təbii ki, ən böyük maneə Ermənistan xarici siyasətidir. Orda da həm radikallar var, həm də diasporun addımları həlledici olur. Azərbaycan tərəfindən heç bir problem yoxdur.

Azərbaycan keçmişə baxdığımızda bu gün çox daha güclüdür. Ən önəmlisi də, yanında çox böyük ittifaq etdiyi bir digər Türk dövləti var. Mən ermənilərə təklif edərdim ki, Şuşa Bəyannamasəni diqqətlə oxusunlar.

- Şuşa bəyannaməsindən bəhs etmişkən, həqiqətən belə bir qardaşlıq nümunəsi dünyada yoxdur. Bu qardaşlığın kökləri haradan qaynaqlanır?

- Bizim qardaşlığımız yeni bir şey deyil. Tarixə nəzər salsaq görərik ki, bu qardaşlıq Osmanlı dövründən başlayıb. Bizim qüvvətli bağlarımız var. Bu həm mədəniyyət baxımından, həm etnik baxımdan. Bu tamam başqa bir qardaşlıqdır. Bu xüsusi bir münasibətdir.

Hər ölkəyə nəsib olan bir şey deyil. Biz nə deyirik? – Bir millət, iki dövlət. Hər dəfəsində bu cümləni qurarkən həyəcanlanıram. Biz hər zaman Azərbaycanlı qardaşlarımızın yanındayıq, hər zaman olduq, bundan sonrada bu qardaşlıq davam edəcəkdir.

Bayraktar da bunun bir parçasıdır, Şuşa Bəyannaməsi də bunun bir parçasıdır. Bundan başqa iqtisadi anlamda da edə biləcəyimiz çox şey var. Həm Azərbaycan və Türkiyə adına, həm də bu bölgə adına görüləcək işlər çoxdur.

- Vaxt ayırıb suallarımızı cavablandırdığınız üçün təşəkkür edirəm.

- Mən də sizə təşəkkür edirəm.шаблоны для dle 11.2