Liderlərin görüşməsinə və danışıqlar aparmasına ehtiyac var. İki ölkə müharibədən sonra yerdə qalan problemli məsələləri masa ətrafında həll etməyə çalışmalıdır.
Mediatv.az xəbər verir ki, bu sözləri politoloq Elxan Şahinoğlu Azərbaycan və Ermənistan liderlərinin dekabrın 15-də Brüsseldə Avropa İttifaqı-Şərq Tərəfdaşlığı Sammiti çərçivəsində görüş barədə razılığa gəlməsi barədə danışarkən deyib.
O bildirib ki, sərhəddəki gərginliyin artırılması nə Azərbaycana, nə də Ermənistana faydalıdır:
”Bizə lazımdır ki, Ermənistanın Baş naziri Nikol Paşinyan sərhədlərin müəyyənləşməsiylə bağlı danışıqlara razılaşsın, dəhlizin açılmasını sürətlənsin, sülh sazişinin mətni üzərində iş başlasın. Bunun üçün müxtəlif səviyyələrdə danışıqların başlaması faydalıdır. Əlbəttə, bir və ya bir neçə görüşdən nəticə çıxmayacaq, ancaq indiki şərtlər altında danışıqların alternativi yoxdur”.
Politoloq son günlər sərhəd toqquşmalarına sosial şəbəkələrdəki fərqli münasibətlərə də toxunub:
“Azərbaycan cəmiyyəti İkinci Qarabağ müharibəsində yekdil idi, fərqli yanaşma yoxuydu, çünki söhbət işğal altındakı torpaqlarımızın azad olunmasından gedirdi. Ancaq sərhəddə baş verən son toqquşmalar və itkilərimizlə bağlı cəmiyyət içərisində fərqli baxışlar meydana çıxıb, bunu sosial şəbəkələrdəki müxtəlif statuslardan da hiss etmək olar. “Zəngəzur dəhlizi məsələsində Qarabağın azad olunması qədər israrlı olmamalıyıq” kimi fikirlərlə razılaşmasam da, fərqli fikirləri və bu mövzuda diskussiyaları normal qiymətləndirirəm, 10 milyon azərbaycanlı eyni cür düşünə bilməz. Zəngəzur dəhlizi və sərhəddəki toqquşmalarla bağlı cəmiyyətdə fikir ixtilafının yaranması o deməkdir ki, bu mövzuların cəmiyyətə daha tutarlı və məntiqli şəkildə izahına ehtiyac var. Hakimiyyət ideoloqları bu barədə düşünməlidirlər”.шаблоны для dle 11.2