Müsavat Partiyasında hazırkı başqana qarşı çıxan, onun legitimliyini tanımayan şəxslərin təşkilatdan çıxarılması kampaniyası davam edir. Hazırda partiya rəhbərliyi Vurğun Əyyubun təşkilat sıralarından xaric edilməsi məsələsinə baxılmasına ciddi-cəhdlə çalışır.

Bu barədə məlumat verən mənbə bildirdi ki, Vurğun Əyyubla bağlı Müsavat MNTK-na onun yeni rəhbərliklə bağlı qurultaydan sonrakı çıxışlarında təhqir elementlərinin olub-olmadığını aydınlaşdırmaqla bağlı göstəriş vermişdi. MNTK isə bu çıxışlarda hər hansı bir təhqir elementlərinin olduğunu aşkarlaya bilməyib. Buna nail olmayan yeni rəhbərlik Binəqədi rayon təşkilatının əvvəlki sədri Nemət Kərimlinin patronajlığı ilə 8-ci özək sədrindən tələb edib ki, özəyin iclasını çağırmaqla üzvü olduğu V. Əyyubu aşağıdan partiya sıralarından xaric etsinlər. Həmin özək aprelin 19-da bir dəfə bu istiqamətdə addım atsa da, rəhbərliyin həmin istəyinin reallaşmasına nail ola bilməyib. 

Bununla belə rəhbərlik yenə də çalışır ki, nəyin bahasına olursa-olsun V. Əyyub partiya sıralarından uzaqlaşdırılsın. Xatırladaq ki, V. Əyyub bir müddət öncə Müsavat Məclisinin üzvlüyündən də xaric edilmişdi.(yenicag.az)