"Azərbaycanda onlar üçün çox önəmli bir layihənin içərisində olmaqdan qürur duyuram".

Bu sözləri Türkiyənin ən məşhur aktrisalarından olan Nəbahət Çehrə deyib. 

20 yanvar faciəsindən bəhs edən, rejissor Vahid Mustafa Yevin ekranlaşdırdığı “Qanlı Yanvar” filmində ana rolunu ifa edən tanınmış aktrisa Nəbahət Çehrə Birləşmiş Ərəb Əmirliklərində yayımlanan “MBC4” kanalı üçün hazırlanan “Turki ekstra” proqramında qonaq olub. Proqramı Zeynəb Özek hazırlayıb. 

Çehrə Faiq Mirzəyev və Azər Aydəmirin baş rollarını paylaştığı film heyəti ilə açıqlamalar verib. 

Aktrisa bütöv bir xalqın azadlıq uğrunda mübarizəsinin əks edildiyi filmdə ayrı-ayrı düşüncəyə sahib olan iki gəncin anasını canlandırır. Çehrə belə bir işdə rol almaqdan çox xoşbəxt olduğunu deyib. 

"Yeşilçam qiymətimi bilmədi. Azərbaycanda onlar üçün çox önəmli bir layihənin içərisində olmaqdan qürur duyuram. Kinoya çəkilmək üçün çox darıxmışdım. Özləmini belə aradan qaldırdılar". 

Xatırladaq ki, tarixi əhəmiyyətli "Qanlı Yanvar" filminin əsas süjet xəttində real hadisələr lentə alınıb. Bir neçə baş rol qəhrəmanının timsalında bütöv bir xalqın susadığı müstəqillik ruhu uğrunda mübarizə canlandırılıb."Qanlı yanvar" filmi sovet ordusunun törətdiyi qırğından bəhs edir və həmin gecə baş verənləri Azərbaycan ailəsi olan Nərimanovların gözü ilə göstərir. İki qardaş - kommunist Nəcəf və inqilabçı Mehdi əks düşüncəyə sahibdirlər. Onlar inandıqları uğrunda ölüm-dirim mübarizəsinə başlayıblar. Dramın mərkəzində isə onların anası - Türkiyənin tanınmış aktrisası Nəbahət Çehrənin canlandırdığı Xədicə xanım dayanıb. Filmdə tanınmış azərbaycanlı aktyorlarla yanaşı Nəbahət Çehrə və Leyn Devis kimi məşhur xarici aktyorlar da çəkiliblər.