Tələbə Qəbulu üzrə Dövlət Komissiyası martın 2-də ali təhsil müəssisələrinin magistratura səviyyəsinə qəbul imtahanının birinci mərhələsini keçirib. 

"Mediatv.az" Komitənin saytına istinadən xəbər verir ki, imtahan Bakı, Naxçıvan, Gəncə, Lənkəran şəhərləri ilə yanaşı, ilk dəfə olaraq Mingəçevir və Şəki şəhərlərində keçirilib. İmtahanın aparılması üçün 39 imtahan mərkəzi ayrılıb.  Bütün mərkəzlərdə imtahan eyni vaxtda – saat 13:00-da başlanmış və 2 saat 30 dəqiqə davam edib.

İmtahanın idarə olunması üçün operativ qərargah fəaliyyət göstərmiş, bütün mərkəzlərdə imtahan təlimata uyğun aparılmış, iştirakçıların öz biliklərini nümayiş etdirmələri üçün zəruri şərait yaradılıb.

Hazırda Komissiyada imtahan protokollarının və cavab kartlarının emalı aparılır. Nəticələrin yaxın iki gün ərzində elan olunması nəzərdə tutulur. 

Qeyd edək ki, bakalavrlar imtahanın nəticələrinə dair ilk məlumatları facebook səhifəmizdən öyrənə biləcəklər.